شكون غادي يخلص الفاكتورة راه فلوسها هادي: اسقاط الحوثيين لطائرة "اف 16″ المغربية. خسرنا فرمشة عين شي 100 مليون دولار وسرب ديالها كيطلب تعبئة 220 عسكري

اعلنت القوات المسلحة الملكية يوم امس الاحد اختفاء مقاتلة "اف 16″ باليمن. الحوثيون اكدوا صباح يومه الاثنين ان الطائرة اسقطها سلاحهم بشمال اليمن، وانهم يتوفرون على حطامها. حطام يساوي الملايير وطلع على المغرب بغسيل اكثر من فندق ماشي فندق واحد.
المغرب يتوفر على 24 طائرة من هذا النوع، 16 طائرة فيها بلاصة وحدة و8 طائرات فيهم جوج بلايص. المغرب كان شرى هاد الطائرات قبل سنوات من عند "ليوكيد مارتين" الامريكية ب1.67 مليار دولار.
هاد الطائرات حسب ما اطلعت عليه "كود" من معطيات حول ثمنها فان الثمن كيبدا من 40 مليون دولار وكيوصل حتى 165 مليون دولار للطائرة الواحدة. الثمن كيدخل فيه تاريخ الصنع ونوعية التجهيزات… واللي كيغليها بزاف هي الصيانة.
حسب مصدر ل"كود" فان سرب طائرات "اف 16″ /مكون من ست طائرات/ بحال اللي كان البارح فاليمن وطاحت منو وحدة كيطلب تعبئة 220 شخص باش يطلع.
دابا هاد الطائرة اللي طاحت ثمنها غادي يقدر يوصل ل100 مليون دولار. مشات فرمشة عين وهاد الشي علاش ناضت القوات المسلحة الملكية ودارت بيان حقاش عارفة الحوثيين غادين يهدرو عليها.
دابا بعد ما نعرفو اش وقع للطيار خاصنا نعرفو شكون غادي يخلص هاد لفلوس، المغرب تبع السعودية وهاد التبعية طلعات عليه غالية بزاف بزاف