مذكرات معاذ لحاقد .."من عكاشة لمولنبيك " 1 : شكر ممنون للحبس

—-
فالصراحة لا يمكنني انكار ان الحبس عندو عليا افضال كثيرة ….
شكرا للناس لي بسبابهم دخلت للحبس ….. متخايلوش قداش درتو معايا لمزيان واخا كانت نيتكم خايبة ، تحبسوني نسكت نتقهر نتعذب نبدل افكاري نتراجع ، لقيتوني علا لقرص عص مص كيف بديت كيفما بقيت وبالعكس زدت كثاااار فالتمرد وتكسير ما يسمى بالخطوط الحمراء.
حبسوني بين الحيوط العاليين وصداع سوارت لبلاندي وفبلاصت مانحس براسي محبوس قلت مع راسي حنا اصلا تزادينا وكبرنا فحبس كبير والحبس الصغير غيدوز حتا هو وكما قال الفيلسوف زنغاشوف:" لو كانت الكرة الارضية كلها دولة سيكون المغرب هو السجن" وكتبت عدد جيد من الاغاني واليوميات لي ماعمرني كنت غنكتب بحالهم كون مكانش الحبس وكذلك قريت الكثير من الكتب لي محال واش كنت غنقراهم كون كنت فالسيفيل ، لحبس عطاني وقت باش نفكر فالكثير من الأشياء ، شكون انا وعلاش كندير هاد شي وطيحني بعض المرات فالشك فهاد شي لي كندير و قراني بزاف ديال لعيبات
عرفت معامن انا و عرفت عشراني ديال بصح لي منساونيش ، كل واحد بطريقتو و عرفت بلي عندي احسن عشران خصام وعشران غا زايدين وزاد اكد لبا بلي عندي خوت رجال منساونيش وقفو معايا وقفة رجال وأخت حنينة لي كتحبس الدمعة فالزيارة من نهار لي قلت ليها الا كنتي غتبقاي تبكي فينما تشوفيني بلاما تبقاي تجي عندي ، كانت هي الأم لي تعدبات بسبابي و كانت هي بعض المرات هي نقطة الضعف ، ملي كنشوفها مريضة وكتقطع وهازة لقفة متخايلوش كيفاش كنحس ، كنعنقها نبوس ليها فوق راسها و كنحاول ديما نكون لابس مزيان وضاحك نهار الزيارة باش تمشي مرتاحة من جيهتي ومع المدة ولفات أو ولينا كنقلبوها غير ضحك ، قالت ليا واحد نهار من باب المزاح : الحمد لله هنا بعدا كنقدرو نشوفوك علا برا الا بغينا نشوفوك خاصنا معاك رونديڤو والله يهديك اخويا ويطلق صراحك ، كنجاوبها وكنضحك : يا ختي ربي راه طالق سراحي غير هادو لي شاديني ….
و بسباب الحبس كذلك عرفت شويا السياسة ديال لبلاد كيف دايرا ، ولقاني بشخصيات وانواع من الناس ، من لبزناز حتا للوزير السابق ، ديما كنت كنسمع كثر ما نهضر باش نستافد أكثر ، كل واحد عندو قصة ، و درت أصدقاء فالحبس لي مزال علا إتصال معاهم لحد الأن . , وحتا ناس لي كنتلاقا بيهم فين ما مشبت كقدموني لصحابهم مفتخرين " معاد رابور مغريبي مدوز الحبس علا قبل اغاني ديال الراب " وكيتعاملو معايا بحالا واخد دوكتوراه فعلم الإجتماع
وبسباب الحبس وليت معروف كثار اولات عندي شعبية كبيرة عند ولاد شعب من جميع الأطياف حينت حسو براسهم فيا ولقاو فالكلمات داك لي لي كيعيشوه داك شي لي مقدوش اقولوه ، بفضل الحبس تاصلات بيا وحدة من بين اكبر شركات صناعة الافلام" بارامونت " باش نبيع ليها اغنية " بلادي " بعشرة لمليون مغربية بغاو اديروها فالجينيريك ديال فيلم سميتو "دي ديكتاتور" متفقناش اوقعو شي مشاكل و قالو ليا خاصك تعطي للدولة لمغربية شي ربعين فالمية ضريبة وتكون عندك بطاقة فنان ، علاش غنعطي لهاد الدولة فلوس ؟ اشنو عطاتني ؟ ياك انا لي كنتحارب و كنتقاتل باش نسجل …
بسباب الحبس كذلك ربحت جوائز و جلت المغرب تقريبا كامل وكنجول حتا فالعالم ( الاردن ،عمان ، القاهرة ، امسردام والكارتي غوج ، برشلونة ، بريطانيا ، فلندا هلسنكي جزيرة سيوملينا ، النورڤيج أوسلو ، سويد غوتنبوري ، ايطاليا ، بلجيكا ….. لذلك فكرت خاصني نشكر الحبس ونكتب ونعاود للناس عليه ، هادي اقل حاجة نقدر ندير معاه
غادي نكون صريح واخا الصراحة غتشري ليا صداع مع بنادم ، غادي نكتب داك شي كيف عشتو وكيف سمعتو بلا زواق و بلا نفاق وغادي نحاول نكون محايد واخا مكينش الحياد يا ايما مع يا ايما ضد ….