وشوفو فين وصلات بنا. شفتو شكون داوه لفرنسا يدير تغطية لزيارة محمد السادس. صفحة سفيان البحري نقلات على لسان محمد السادس علاش ما مشات لكلميم وبانع غادي يزورها

مازال سفيان البحري هو الناطق باسم الملك ينشر صوره وينقل اخباره كثر من لوماتان والتلفزيون ولاماب. في الوقت اللي ما خلاو حتى صحافي يغطي زيارة الملك الى فرنسا على اهميتها واللي ما داتهاش فيها الصحافة الفرنسية، اكتشفنا ان المدعو سفيان البحري بوحدو عندو تصاور الملك الخاصة خلال جولاته الباريزية. كاليك كيتاصلو بيه وكيعطيو هادوك الناس لخبار.
امس الثلاثاء وصلاتو صورة فالحين ديال مرا وولدها من كلميم تصورو مع الملك وكالو ليه وفق رواية عبقري زمانه " مشينا عندو سلمنا عليه وقلنا لو حنا صحراوا من ڭلميم وكانبغيوك بزاف وسولناه واش غايجي لڭلميم قال لينا: دابا ماكايناش فالبرنامج ولكن غانجي ليها إن شاء الله.. شحال والواليدة كاتدعي معاه الله يشافيك الله يطول لينا فعمرك وهو كايقول آمين آمين، منين جينا قدامو ماعرفناش مانقولو من كثرة الفرحة عجز اللسان عن الكلام، الله يخليه لينا".
دابا البحري ما بقاش غير فالصور ولى وكالة انباء كتتكلم باسم الملك وهاد الشي خطير. يعني ان ما ينشر يتم بموافقة القصر وان صفحة ماشي رسمية دخلات فالسياسة، لانه بخصوص عدم زيارة الملك الى كلميم لاول مرة يقول الملك والعهدة على الصفحة "راها ما كانش مبرمجة" وانه "غادي يجي لكلميم".
على هاد لحساب تحيد كل وسائل الاعلام ويعوضوها بهاد الصفحة على الفايسبوك. هزلت