فضيحة هادي. واش بصاح وكيل لائحة العدالة والتنمية بسيدي قاسم عطاوه ترخيص ديال سطاسيون باش يترشح معاهم. فرد من عائلته "كلشي كذوب والحرفي عبد الرحمان ترشح باختيارو ولمقدمين والسلطة كالو لينا بعدو من البي جي دي

اليوم حزب الاتحاد الدستوري اللي ما مسوق ليه حد خرج بيان كيكول باللي العدالة والتنمية خطف ليهم مناضل ديالهم ورشحو وكيل لائحة المصباح بسيدي قاسم وهو عبد الرحمن الحرفي. كالو فالبيان باللي هو "برلماني سابق ومنتخب جهوي ومنسق اقليمي للحزب" وكالو باللي
تم اللجوء الى "الى استغلال النفوذ من طرف الإدارة العمومية التي يعتبر رئيس الحكومة بحكم القانون رئيسها المباشر" وتم استغلال "كل الوسائل التابعة للدولة وبشكل إرادي ومتعمد , من أجل استمالة العديد من الفاعليين السياسيين للانضمام إلى صفوف العدالة والتنمية من خلال صفقات مشبوهة ومدانة" وباللي عطاوه رخصة شحال وهو كيتسناها في اشارة الى رخصة لسطاسيون ديال ليصانص.
هاد الشي كلو كذوب يقول احد افراد عائلة الحرفي ل"كود". المصدر قال ل"كود" "عبد الرحمان الحرفي ماشي منسق كيف كالو. بغيناهم غير يجيبو لينا شي ورقة على هاد الشي" ثانيا "المحطة فاسم فريد الحرفي وهو برلماني من الاتحاد الدستوري وعضو مكتبه السياسي وما استاقلتش".
مصدر "كود" قال ان المحطة كانت عندها رخصة رسمية هادي عام وشوية وان الحرفي فريد للي من الاتحاد الدستوري كال لوزير الطاقة والمعادن عبد القادر عمارة باللي اللجنة تعطلات وكان هاد الشي قدام رئيس الفريق. وباللي كلشي قانوني وما كاينش شي تدخل او مساومة او ما شابه ذلك.
مصدر "كود" اكد ان الحرفي عبد الرحمان تقدم بطلبه الى حزب العدالة والتنمية بجرف الملحة اولا وطلع الطلب لسيدي قاسم ثم القنيطرة عاد وصل للرباط وان ترشيحه اختيار شخصي وانه غادي يستاقل من الجهة ومن الحزب نهار الاثنين وما عندو علاقة بالاتحاد الدستوري،
مصدر "كود" اكد ان هناك ضغوط كثيرة على العائلة من قبل مقدمين واعوان سلطة وكثار من اعوان "كالو لينا ما ترشحوش مع العدالة والتنمية. هاد الشي خطير وما باغينش نهدرو فيه دابا".