سيدنا باغي يقولينا: هانتوما ختاريتو شكون يحكمكم بطريقة ديمقراطية وهانتوما كتشوفوا النتيجة تاواحد مايفرح راني انا حاميكم من كروش لحرام

بعد المرات من خلال خطابات الملك الأخيرة ، كنبدى نتخايلوا كيركب معانا فالطاكسي كبير ، وكيسمع الحوارات لي كيدوروا بين الركاب ، والشكوى ديال الشيفور من السياسيين ، أو واقف فشي صف طويل فشي مقاطعة كيتسنى المقدم يعطيه شي ورقة وطالق ودنيه على آش كيقولوا المواطنين لي طالع ليهم الدم للراس على الإدارة المغربية ، وكيفاش من بعد مغتشد الورقة من المقدم غادي توقف فنفس الصف فإنتظار امضاء القايد ، ومن بعد غتوقف فنفس الصف باش تكاليزي الورقة ، وكنتخايلوا شاد صف فشي مستوصف ديال الحي ، رفقة النساء لي جايبين ولادهم يديرو الجلبة وأغلبهم كيبكي بصوت موحد كيدير حريق الراس ، ورفقة المعوزين والفقراء والبسطاء وكيتصنت لشكاوى المواطنين وهوما شادين النوبة لساعات ، من أجل كشف طبي مع طبيب أو طبيبة البعض منهم مكيشوفوش حتى فيهم ، غي كيهدر المريض لاخر كيعمر ورقة بالدوا ، فإنتظار المريض الآخر
كنتخايلوا حتى هو كالس فشي قهوة محشرة ديال راس الحومة ، معيط على نص نص ، ومجمع مع دراري فيهم لي معطل فيهم لي مجاز وخدام سيكوريتي ل 12 ساعة ، وكيتشكاو من الإنتخابات والسياسيين والأحزاب لي كلهم بحال بحال ، وكيفاش راه تشكيل الحكومة معندو حتى شي معايير إيديولوجية ، وكيفاش السياسين لي قبل الإنتخابات مخلاو فبعضياتهم غي لي نساو ، ودابا هاهوما صحاب وحباب من أجل تشكيل حكومة وتوزيع الحقائب الوزارية لي محتاجها المغرب ولي لا ، على المعارف والصحاب ، وأن الأمر غير مهزلة من أجل إقتسام الوزيعة ونيل الإمتيازات ، ومن أجل إستغلال البلاد خمس سنوات أخرى .
كنتخايلوا شاد المشقوف وكيتسركل فالفايس وكيقرى آش كيكتبوا الفايسبوكيين على الإنتخابات وعلى بنكيران ولشكر وشباط والعماري وأخنوش والعنصر ، وعلى التماسيح والعفاريت ، وحتى هو كيتأثر باليأس لي كيسري فأغلب الكتابات فالفايس من العملية الإنتخابية ككل ومن تشكيل الحكومة ، ويقدر يدير جيم هنا ويكتب تعليق لهيه ، ومن هادشي كامل كيستقي المواضيع للخطابات ديالوا، حيث حاليا الملك هو الوحيد لي باقي كيدوي على المواضيع لي كتهم المواطن البسيط والبرؤيا ديالو ، الملك هو ممثل الشعب لدى الحكومة والبرلمان ، وهو الوحيد حاليا لي هاز الهم للبلاد بعد أن أبان باقي السياسيين على تهافت وانتهازية غير مسبوقة على المناصب والمقاعد بكل تلاوينهم .
سيدنا باغي يقولينا ، هانتوما ختاريتوا شكون يحكمكم بطريقة ديمقراطية ، وهانتومة كتشوفوا النتيجة تاواحد مايفرح ، وراه كون مكنتش أنا ضامن الإستقرار وحاميكم من هاد كروش لحرام كون كلاوكم ، والخلاصة ديال آش فهمت من هادشي هي سيدنا مزيان ولي دايرين بيه مزيانين ، ولكن لي ختارهم الشعب هوما لي ممزيانينش .