المغرب يخطف الأضواء من جديد ويطفو على سطح الاحداث ديال واحد المونتيف كان من العيار الثقيل هاد المرة و كان في واجهته الماجيدي للي ولله الحمد دار لينا بلاصتنا جنبا إلى جنب الدول العظام بحال روسيا إيسلندا وإيران فواحد الفضيحة كان يدبرها من وراء الكواليس ما يناهز 376 صحفي لي حافظو على سريتها خلال عام وللي كانوا كينتميو لتمنين دولة مختلف واشتغلو على إخراج هاد "الفضيحة" لي كانت أضخم فرشة فتاريخ البشرية والمتمثلة في أكثر من حداش لمليون وثيقة مسربة في الاصل من عند واحد خونا "حميدة لفرشة" مجهول الهوية دارت ليه فلخوا وناض سلم شي وثائق لواحد الجريدة ألمانيا لي ناضت بدورها وعطاتها لواحد الشبكة مستقلة سميتها التجمع الدولى للصحافة الإستقصائية لي ماكانتش تاهيا من العاكزين وناضو بعد التحقق من الوثائق مزيان ضربو الطر لبزاف ديال الدول والأمراء والمشاهير والصحافيين والرياضيين والكاتب الخاص والمستشار ديال الملك للي هناك رهانات كثيرة على إمكانية ان تنهار أمبراطوريته في حالة ما "وهذا هو المفترض"هادشي تفاقم ولقى شي ردود فعل قوية
طبعا التوقيت والسياق لي تلاحو فيه التسريبات والشخصيات والدول الواردة أسمائهم يؤكد بشكل واضح أن "القضية فيها إن" ومدبرة، خاصة ان أجهزة المخابرات الغربية والامريكية تحديدا كانت على درية تامة بهاد الوثائق ، ومطمرة على داكشي على ما يربو على عام تقريبا ديال لخدمة والتحقيق حتى دقت ساعة الحسم، للي بينت أن هناك إستهداف غير بريئ لواحد الثالوث كيكشل مصدر قلق لماريكان ولي نقدرو نعتبروه صيد ثمين لصالحها وهو الثالوث ديال روسيا بالدرجة الاولى للي الانتخابات عندها على الابواب ثم إيران وبشار الأسد …أما بالنسبة لأمراء الخليج الجزائر وتونس ومصر والباقون والماجيدي ديالنا غير خرج فيهم لبلان وصافي ، ,وأصلا هما عارفين بلا التداعيات وردود الافعال من طرف الرأي العام في الدول الغير الديمقراطية للي تجبدو في معظم الاحيان مغتكونش بداك التأثير لي يقدر يزعزع إستقرارهم، لكون هادشي ديال الفضائح عندنا "كعرب" مثلا ولا شي حاجة لي جاري بها العمل، وبالتالي الصدمة تكاد تكون شبه منعدمة بالمقارنة مع دول خرا كإيسلندا مثلا لي ناضو حيحو على المتورطين لي كان من بينهم رئيس البلاد فمظاهرات وطالبو بإستقالة الحكومة إحتجاجا على هاد التخلويض .. غير هو بالنسبة لينا حنا المغاربة الشي الايجابي فهادشي هو أنه غادي يقدر يعطينا إجابة على نحو ما على واحد السؤال لي بقا معلق من شحال هادي ديال (أين الثروة) ، وغيوفر علينا نسبيا عملية البحث ، ومن ناحية خرا غادي يتطرح سؤال خر ديال أنه في الوقت للي بزاف ديال الدول للي ناضت حيحت على حسب حدة إستهدافها فهاد التخلويض علاش سي الماجيدي لي كان بالمناسبة ناض رفع دعوى قضائية على كود وطالب بتعويض 500 مليون لجبر الضرر، وماناضش رفع دعوى بالموازة ضد هاد المؤسسات الاعلامية والصحافيين لي سربو الوثائق، حيث راه يقدر هادشي الليحضر السلامة يؤثر بشكل ما على ثقة التي يتمتع بها لدى الملك،ويحدث ما لم يكن متوقع …ويصدق مزرف فيها بشي صابونة.. والسؤال لاخر ; علاش خوتنا ديال 360 صم بكم عمي فهم لا يبصرون ؟ أش هاد السكتة الحارة ؟ خلاها مولاها … تكلم حتى أراك
