ليلة ضرب ديموقراطيتنا الفتية: التصريح الفضيحة لبنعرفة العدالة والتنمية. العثماني باين كتبو ليه البيان وباين شكون مولاه وهو بان انه ممثل بارع في تقمص دور بنعرفة: ها المراحل اللي كالو ليه يتبعها ها الاولويات اللي حددوها ليه

بدا سعد الدين العثماني المكلف بتشكيل الحكومة غير مقنع ابدا وهو يجمع عليه قادة 5 احزاب بالاضافة الى مصطفى الرميد وهو عن العدالة والتنمية ليعلن عن تشكيل حكومة من احزاب العدالة والتنمية والتجمع الوطني للاحرار والحركة الشعبية والاتحادين الاشتراكي والدستوري والتقدم والاشتراكية. باين من بلاصة كل واحد باللي حزب اللامبة طيح السروال بزاف بزاف. تبندر ادريس لشكر ديال الاتحاد الاشتراكي اللي شوه حزبو وجاب نتائج مقودة وبين باللي فاشل وتفرض على هاد الحكومة.
العثماني او بن عرفة الحزب تقمص الدور مزيان. بغى بيان مقنع للرأي العام لكن ناقصو الصدق. بان باللي دمية تحرك من الخلف. كان ان هاد الاغلبية مؤطرة بالمقتضيات الدستورية والمنهجية الديموقراطية والارادة الشعبية. كان كيكذب طبعا حقاش الناس ما صوتاتش على الاتحاد الاشتراكي ما صوتاتش باش 37 ديال التجمع الوطني للاحرار تتحكم ف125. العثماني بان مهزوز ضعيف كيقدم مصطلحات وكيدير نقضيهم. اش من دستور واش من منهجية ديموقراطية واش من ادارة شعبية.
بنعرفة العدالة والتنمية تحدث بعد ذلك عن الاتفاق بين هاد الرباعة على توزيع الحقائب وتحديد الوزراء وقال ان هاد الشي غادي يكون وفق خطاب داكار ديال محمد السادس. ولا كان هاد الشي كيف بغاه الملك نحيدو كلشي لا ديموقراطية لا انتخابات لا صداع الراس ونجيبو تنقنوقراط ومريضنا ما مشى معاه باس
بنعرفة العدالة والتنمية قال ان هناك "الارادة الحازمة لتجاوز العقبات التي حالت دون تشكيل الحكومة في الاشهر الماضية" وان هاد الحكومة غادية تكون حكومة "قائمة على الفعالية" و"حكومة تعكس الاوليات الكبرى" ك"اصلاح الادارة" و"رفع تحدي جودة خدمات التعليم والصحة والشغل" و"مقاومة الفساد" و"استحضار اهمية السياسة الافريقية تفرض توجهات مهمة"
واضاف "سنحرص على انهاء اصلاحات الحكومة الماضية رعاها جلالة الملك". هنا نسى صاحبو بنكيران. كلشي الزوين نسبو للملك محمد السادس. شفتو علاش قلنا تقمص مزيان دور بنعرفة.
حقاش قال باللي هاد الحكومة غادية تكمل "اصلاح منظومة العدالة و"تنزيل رؤية 2030 فالتعليم" و"ورش التنمية القروية" و"تطبيق الاستراتيجية الوطنية المتعلقة بالطاقة"
وقال انه سيتم خلق لجنة ستنكب على اعداد البرنامج الحكومي بالموازاة مع ورش الهيكلة واخراج الحكومة
وانهى كلمته اللي غادية تدخل للتاريخ باش تبين نهار بعدنا على سكة الديموقراطية "عازمون على اخراج حكومة تحديات" "حكومة انجاز حكومة انتاج حكومة فعل"