اتحاديون طالع ليهم الدم: علا من كيضحك لشكر ياك دار نسيب مجاهيد وزير ودابا يقلب على شكون يصوت ليه فالبرلمان

الاتحاد الاشتراكي نايضة فيه. فالحقيقة الحزب اعتاد على هاد الشي لكن تمثيلية البارح كيف وصفها عضو في المكتب السياسي ل"كود" غادية تزيد تؤزم الوضع. مصدر "كود" قال ان ادريس لشكر كيضحك على كلشي باش ناض كيشكر فيونس مجاهيد اللي كتب كيسب فحليفو الجديد العدالة والتنمية. مصدر "كود" اضاف "اش بغى هاد مجاهيد اللي ما دار والو فالانتخابات واش بغى يكون وزير بصاح" ثم اضاف "ياك لشكر دار ليه نسيبو بنعبد القادر وزير اش بغى".
بنعبد القادر مزوج باخت مجاهيد. كان وفق المصدر نفسه مع البام "مشى مع اخشيشن فهاديك "لكل الديموقراطيين" ومن بعد رجع". واضاف "ياك جابو اليازغي =ايامات كان الكاتب الاول للحزب= ورشحو للشمال وحيد اشهبون وما ربح والو، علاش جابو وزير ومنين وصل ليها".
بخصوص اجتماع امس السبت قال مصدر "كود" "راه ما حضر ليهم والو من كتاب الجهات وكتاب الاقاليم فجهات سوس والجهات الثلاث للصحراء وحتى الشمال شفتو رئيس الفريق في مجلس المستشارين العلمي اش من موقف خدا".
مصدر "كود" قال ان لشكر دابا قلق غالبية اعضاء مجلسي النواب والمستشارين ويمشي دابا يقلب على شكون يصوت معاه