سلسلة "كيفاش السلاطين ديال المغرب كايشوفو "ريوسهوم" وكايشوفو السلطة ديالهوم وكايحميوها؟ اللي كتنفرد بنشرها "كود" =ح 14 !" كيفاش كانت الدولة الصنهاجية المرابطية مهيكلة سياسيا ودينيا؟

في الحلقة السابقة تكللمت على الدعوة الدينية والمشروع السياسي والاجتماعي للي اقتارحو "عبد الله بن ياسين" على ولاد عمو الصنهاجيين، وللي وظظفوه في المسيرة ديالهوم في اتجاه المغرب الشمالي وبناء الدولة المرابطية..
وفي هاذ الحلقة، غادي نحاول نرسم الهيكلة المؤسسية ديال الدولة المرابطية الناشئة من أجل اجتياح المغرب الكبير ثم الدخول والاستيلاء على الجزيرة الإيبيرية….
هيكلة "الدولة المرابطية الصنهاجية الجديدة" الناشئة من أجل التحرك نحو أراضي الشمال…
مع تأسيس "حركة المرابطين الصنهاجية"، بان بللي القيادة ديالها كان عندها جوج ديال الريوس: "رأس ديني" كايمثثلو "الفقيه عبد الله بن ياسين"، و"رأس سياسي عسكري" كايمثثلو "الأمير يحيى بن عمر" للي تولى الإمارة من بعد " يحيى بن ابراهيم"…
ولكن للي كايظهر لينا من خلال الكتابات الهيسطوريوغرافية، أن الرئيس الفعلي في هاذ التنظيم هو "الفقية بن ياسين"…وابن أبي زرع الفاسي صاحب "روض القرطاس" كايعببر على هاذ التفوق ديال "الفقيه" بواحد الواقعة كايسردها، وللي كاتقول أن "ابن ياسين" شي نهار قام الحد على "الأمير يحيى بن عمر" بحيث جلدو 20 جلدة وبلا مايقول ليه آشنو هي التهمة للي كايوججهها ليه، وقبلها السيد بلا ما يحتج عليه !!!وسواء كانت هاذ الواقعة صحيحة أو ما صحيحاش، فهي كاتعكس لينا الوضع الجديد للي اصبح عليه الفقيه الداعية داخل التركيبة السياسية المرابطية…
هاذ التحالف بين قبائل صنهاجة حول هاذ المشروع، وبهاذ الهيكلة السياسية الدينية، غادي يغتانم فرصة رسالة جات لعبد الله بن ياسين من عند الشيخ ديالو "وجاج بن زلوي" السجلماسي للي ذكرتو من قبل، وللي كايتشكى فيها من ظلم "قبائل زناتة ديال بني خزرون"، وغادي يحررك الجيش ديالو نحو "سجلماسة" سنة 1053 ميلادية، وغادي ينتاصر على "سلطان زناتة"، وغادي يحذف جميع الضرائب للي كاتتعارض معا التعاليم للي عطاها للطلبة ديالو، ومنع أدوات الموسيقى لأنه كان كايشوفها "حرام ومن عمل الشيطان"، ومنع جميع أنواع الخمور، ورشى "الفقهاء والطلبة" بحيث اعطاهوم الخمس ديال الغنائم، وعيين قائد من "لمتونة" على سجلماسة !!
ولكن في سنة 1056 ميلادية، ثارت "تافيلالت" على السلطة الجديدة…ولكن هاذ الانتفاضة كانت فرصة سانحة للمرابطين باش يقمعوها، وباش يتقددمو نحو "سوس ماسة" و"تارودانت"..وماجات تجي سنة 1061 ميلادية، حتى كانت الحركة المرابطية مكتاسحة جميع عبور المغرب الحالي…
قبل هاذ السنة بعامين، أي في سنة 1058 ميلادية، الحركة المرابطية وصلات للشاوية، ودخلات في حرب ضد "الدولة البرغواطية المصمودية"…ولكن شراسة ومقاومة البرغواطيين كانت قوية جدا لدرجة أن "الفقيه عبد الله بن ياسين" تتقتل في هاذ الحرب…وهنا غادي تتغير كًاع معالم البنية السياسية/الدينية ديال الدولة الناشئة…بحيث أن "الأمير والقائد العسكري" "أبو بكر بن عمر" جمع بين يدديه جميع السلط، وهي نفس السلط للي غادي يورثها من بعدو "يوسف بن تاشفين"…بحيث في سنة 1061 ميلادية، "أبو بكر بن عمر" رجع للصحراء باش يقابل الغزوات ديالو ضد "ممالك السودان"، وعيين ولد عمو "يوسف بن تاشفين" على المغرب…ومللي شاف القوة الحربية ديالو كبرات وتزادت، خللى ليه كولشي، ومشى بحالو نهائيا لجنوب الصحراء…وهنا غاديا تعرف "حركة المرابطين" منعطف جذري في تاريخها…
الكتابات التاريخية وشبه التاريخية الرسمية، كاتصوور لينا "يوسف بن تاشفين" على أنه اعطى السلط الدينية كولها للفقهاء، واكتفى هو بالسلطة الزمنية، وهو الشي للي عطاه "شرعية سياسية" جديدة، وخلاتو يكون الآمر الناهي في الدولة الناشئة !!
نشوفو دابا كيفاش هاذ الكتابات التأريخية كاتصوور لينا عملية إضفاء الشرعية على سلاطين الدولة المرابطية انطلاقا من دور الفقهاء في الداخل، وانطلاقا من تبعية الدولة الصنهاجية للخلافة العباسية السنية الآتية من الخارج…