حارس العمارة اللّي لقاو فيها متفجرات اليوم بفاس لكود. ها كيفاش عاشو سكان العمارة وها كيفاش كرا الشّقة زعيم الخلية اللّي كان غادي يرجع لبلاد حمام دم

أجرت "كود" حوار مع حارس العمارة السكنية الكائنة بشارع الجيش الملكي، وسط مدينة فاس، التي ضبط بداخل إحدى شقهها، خلال الساعات الأولى من صباح اليوم السبت، أسلحة بيضاء ومتفجرات وأصفاد بلاستيكية، وغيرها من المواد الخطيرة، التي تخضع حاليا للتحاليل المخبرية الجاري بها العمل من طرف مصالح الشرطة العلمية والتقنية.
سؤال: شحال هادي وهداك خونا اللّي طارو عليه اليوم "البسيج" وهو ساكن فعمارة "دنيا"؟
جواب: صراحة كان واحد هو اللّي كاري وهو اللّي جاو البوليس سولو عليه أما لاخور صاحبو جا عندو تقريبا هادي شي 8 أو 10 أيام لا اكثر.
سؤال: بشحال كان كاري تما وواش كاينة شي كونطرا او لا والو؟
جواب: تقريبا كان كاري بشي 400 درهم او 500 درهم في اليوم الواحد ومكان داير لا كُونْطرَا مع مول الدار لا والو غير حاط ليه "لاكارط ناسيونال" ديالو وصافي.
سؤال: كيفاش كرا ليه بلا "كونطرا"؟
جواب: هاد خونا اللّي شدوه اليوم كان كيقول ان الام ديالو غادي تجي من خريبكة لمولاي يعقوب ومول الدار سحابو بصّح لكن ف الاخير مجات لا مو لا والو.. وجا عندو غير واحد صحبو يقاربه سنا.
سؤال: شنو الاحساس ديالك مني جاو البوليس باش يشدو ديك الارهابي؟
جواب: مكنذبش عليك عندي 3 ديال لوليدات وكولنا تخلعنا والزوجة ديالي بقوة الخلعة هبط منها الدم لكن دبا شويا لاباس.
سؤال: كيفاش كان كيبان ليك ديك خونا ف الملامح ديالو واش عادي؟
جواب: عادي جدا كأي واحد من السكان وبيني وبينو غير السلام وصافي وحتى صاحبو مكاينش السلام بيني وبينو حيتاش عاد جا هادي شي 3 أيام والأعمار ديالهوم قريبا تتراوح ما بين 28 و 35 سنة