هانتوما نشرتو لوائح بأسماء الاساتذة المتغيبين و من بعد ؟ غايدخل هاد المعلم للقسم و ماغايقريش الدراري توسامبلومو ! و ديك الساعة غاتجي الدقة فالتلميذ لي هو الحلقة الأضعف فهاد شد ليا نقطع ليك لي بين الوزارة و الاستاذة

كلشي عارف بلي مستوى المدرسة العمومية المغربية وصل للحضيض و حتى من داك المواطن البسيط لي ماعندوش باش ولا هربان منها و كايتقاتل و يقطع السباط باش يسيفط ولدو للبريفي ! و فينما كايجي شي وزير جديد يشد التعليم كلشي كايساين باش يشوف واش غادي يطرا شي تغيير ؟ غادي تحسن شي حاجة ؟ غادي يبان شي فرق ؟ ساعة والو ! كايتبدلو الوزراء و المغاربة عام على عام كايزيدو يفقدو الثقة فالمدرسة العمومية.
مؤخرا نشرات وزارة التربية الوطنية شي لائحة قالك آ سيدي ديال اساتذة متغيبين ! كيفاش متغيببن و علاش ؟ واش متغيبين عندهم عذر و لا بدون عذر؟ واش الاستاذات المتغيبات حاملات و لا غي رشقات ليهم يجلسو فديورهم ؟ هادشي ماعطاتوش الوزارة ! لي عطات هوا واحد اللائحة فيها أسماء الاساتذة و صافي باش تتسمى الوزارة راها زعما خدامة على قدم و ساق.
بين 2008 و 2015 ، أكثر من ميتين مدرسة تسدات فالمدن من بينها 135 مدرسة ابتدائية ! و ولاد دوك المدارس سيفطهم لمدارس خرا يتزاحمو مع تلاميذ خرين و مؤخرا المجلس الأعلى للحسابات دار واحد التقرير لي محطوط فوق البيرو ديال سي حصاد بين بلي من المشاكل الكبرى لي كاينة فالتعليم هي غياب الموارد البشرية الكافية ! ماكاينينش آ سيدي المعلمين و الأساتذة الكافين باش يقريو ولاد المغاربة، الهدر المدرسي وصل ل4 فلميا يعني الدراري واخا كاتوفر ليهم مدرسة و معلم ماكايمشيوش يقراو (سير نتا عالج ليهم الفقر و التفكك الاسري و مشاكل الطرونسبور عاد ندويو على المدرسة) ! و عاد زيد مشكل الاكتظاظ لي خلانا نشوفو اقسام فيها ستين سبعين تلميذ بغاتهم الوزارة يقراو و يوليو أطباء و مهندسين و هوما مزاحمين خمسة فالطاولة، و الخريطة المدرسية لي كاتخلي شي مناطق فالمغرب فيهم فائض أساتذة و شي مناطق كاتعيش الخصاص ! و عاد زيد على هادشي مستوى الأساتذة لا المتعاقدين لا لي خدامين مع الوزارة لي ماكايستافدو لا من تكوين لا من تحفيز لا والو ! غا كايطلقوهم وسط الأقسام و كاينساوهم، عرام ديال المشاكل كاتعيش فيهم المدرسة المغربية و عرام ديال المشاكل كايتخبط فيهم الأستاذ لي وسط الاكتظاظ و غياب الوسائل الدياليكتيكية و الراتب الهزيل خاصو قالك آ سيدي المردودية و يصنع لينا الأطباء و المهندسين، و هادشي لي كايخلي المواطن يفقد الثقة فالمدرسة نهار على نهار.
دابا السؤال لي كايتطرح هوا واش الوزارة باغا تحسن من جودة التعليم بصح و تزيد بهاد القطاع للقدام ولا باغا تمشي فطريق القرارات الشعبوية لي ماغاترجع بالنفع على تاواحد؟
حيت لاباغين نحسنو من جودة التعليم راه الطريقة باينة ! قالتها اليونيسكو و قالها المجلس الأعلى للحسابات و قالوها تقارير و منظمات دولية ! قالك خاصكم تطلقو الگرمومة و ديك 6 فلميا ديال الناتج الوطني الخام لي مخصصها للتعليم تزيد فيها ! باش يدخلو معلمين يقريو و يتخلصو ! و باش يتصلحو الكوابن فالمدارس ! و باش يتشراو الطاولات و الطباشير و الستيلوات … خاص ظروف ملائمة للاستاذ فين يخدم.
ايه الأساتذة كاين فيهم لي كايغيبو بدون سبب! كيما الموظفين ديال گاع القطاعات و هادشي خاصو يتحارب بالقانون.
تعلق لائحة بأسماء اساتذة متغيبين عوض تلتجئ للمساطر القانونية معاهم كايبقا غير واحد القرار شعبوي! غايخلي شعيبة لي جالس فالقهوة يقول لصحابو " آ سيدي هاد حصاد و الله الا زمط ليك الاستاذة" ! و لكن واش بالزميط غايتحلو مشاكل التعليم وولد شعيبة غايلقا لي يقريه فالمدرسة ؟
القانون راه واضح الاستاذ لي مغيب راه خاصو يقدم شهادة طبية !
كان عندكم شي مشكل مع الشهادة الطبية ديرو ليه كونطر فيزيت
كان مغيب بدون مبرر يتعرض على المجلس التأديبي و سدات مدام.
النشر ديال أسماء أساتذة متغيبين و بلا مايتنشر حداهم سبب الغياب معناه بلي كاين واحد النية خبيثة لتوتير العلاقة بين الوزارة و الاستاذ ! و فيمن غاتجي الدقة ؟ غاتجي فالتلميذ الدرويش بطبيعة الحال لي لاحتو الأقدار للمدرسة العمومية ! حيت الأستاذ و الله و ماكان محفز باش يخدم مع الدراري لاخدم ! و فحال هاد القرارات غير كاتزيد تحقدو على الوزارة و على المهنة ! و الله و ماكان انتقاء على حقو و طريقو للأساتذة قبل مايوليو اساتذة و تحفيزات و برامج تكوينية و مرتب محترم و ظروف عمل ملائمة لا صورات الوزارة شي حاجة من هادشي ديال اللوائح.
راه ماشي بالشوهة و جر ليا نقطع ليك وفحال هاد القرارات الشعبوية غايزيد التعليم لقدام.
هادشي كايبين بلي الوزارة ماقاداش تطيح سنانها فالمشاكل الكبرى للتعليم و كاتختار تساطح مع الاستاذ لي هو الحلقة الأضعف فالسلسلة و صافي.