صورة الملك دايرية بيه عائلتو. او كيفاش صورة بعد عملية صعيبة ردات على اسئلة حول غياب رئيس الدولة وعطات جواب وطمنئناتهم

كان يكفي صورة. صورة الملك محمد السادس محاطا بولي العهد مولاي الحسن والاميرة لالة خديجة واخوته مولاي رشيد ولالة مريم ولالة حسناء ولالة اسماء باش تجاوب على اسئلة وتخلق صدمة عند لمغاربة باش شافوها. شي كيبكي تاثرا وشي كيدعي وشي فرح بنجاح العملية الصعيبة على القلب.
هنا العملية ديال التواصل السياسي كانت مفيدة على اكثر من مستوى. اولا لمغاربة اللي كيسولو فين غايب سيدنا عرفو باللي كان مريض. ثانيا لمغاربة عرفو حالتو الصحية باللي دار عملية صعيبة ودقيقة علي القلب. ثالثا عرفو باللي هاد العملية نجحات
بيان الاطباء قدم اجوبة كثيرة فهاد العملية التواصلية. عرفو لمغاربة العملية فين دارت وشكون دارها وطبعا وهادا هو المهم عطى البيان معطيات كثيرة على العملية وطبيعتها وامور كثيرة.
هاد البيان واخا قدم معطيات ما كانش عندو اثر بحال الصورة. الصورة قالت كلشي. طمئنات لمغاربة جاوباتهم على كل ما يدور فراسهم. وضحات ليهم الامور. رمز الوحدة فهاد البلاد واخا العملية صعيبة بيخير ومدعوم ومسنود بعائلته. عائلة فرحانة بحال لمغاربة بنجاح العملية.