علاش المغرب غادي يدير اتفاقية الصيد البحري الجديدة مع اوربا وفيها الصحراء “مياه مغربية”. اسبانيا دارت 58 مليون اورو وصيدات 30 الف طن ومخدمة 1500 شخص

قرار المحكمة الاوربية الاخير بخصوص اتفاقية الصيد البحري المغربية الاوربية اللي كيستثني الصحراء من المياه الاقليمية المغربية غادي يضرب مصالح اسبانيا. غادية تكون اول متضرر. هاد الاتفاقية مازالت سارية المفعول الى شهر يوليوز٬ غير علاش اسبانيا خاسرة فهاد البيعة والشرية؟
وفق ما نقلته يومية “ا بي سي” الاسبانية فان حجم الحركة التجارية من الصيد في المياه الجنوبية بالمغرب =الصحراء= من 2014 الى 2018 وصلات ل58 مليون اورو وان هاد القطاع خالق 1500 منصب شغل وان الاسبان صيدو شي 20 الف طن ديال الحوت.
القطاع الاخر المتضرر وفق اليومية نفسها هو موانئ جزر الكناري اللي كيحطو فيهم السفن الاوربية الحوت اللي صيدوه. اليومية قالت ان 47 باخرة اسبانية اللي كيتصيد فالصحراء غادية تشومري. فيها 32 من الاندلس و12 من الكناريا و5 من گاليسيا. هادو كلهم كيعيشو مرحلة الشك.
طبعا كاينين بواخر من ليتوانيا وهولندا وبولونيا والمانيا حتى هما غاديين يشوميو
موانئ الكناريا كانت كدير نشاط تجاري يقدر ب3.5 مليون اورو غير من تفريغ الحاويات اللي كتوصل 55 الف طن من الاسماك وفق المصدر نفسه. قطاعات كثيرة غادية تضرر خاصة الشركات الصغرى والمتوسطة اللي خدامة فهاد القطاع. هاد الشي غادي يدفع باسبانيا انها تضغط لاتفاق جديد ما يزيدش الازمة على ما تعيشه اليوم هذه الدولة من ازمات خاصة فالشغل