“وفاة” القائد العسكري حفتر حجر عثرة فاتفاق الصخيرات ورجل الامارات. واش المغرب كيوجد شي اتفاق مع فرنسا حول مستقبل ليبيا وهاد الشي كان فلقاء الملك بماكرون

دابا كاين تشكيك فوفاة القائد العسكري الليبي وزعيم “جيش ليبيا الوطني” خليفة حفتر٬ 75 سنة ففرنسا. اللي كيظهر ان السيد مات وشبع موت فمستشفى “فال دو گراس” الباريسي. واخا جا تكذيب المتحدث باسمو كيقول باللي حفتر غادي يرجع لليبيا وقال المتحدث ان “المشير حفتر شعر بالمرض عندما كان في باريس، خلال جولة كانت تشمل زيارة عدة دول، وإنه سيعود إلى بلاده سريعا … بعد تلقي العلاج”.
دابا دازت هادي يومين وما بانش. وسائل اعلام ليبية قالت باللي السيد اصيب بجلطة دماغية او ازمة قلبية وودع. بينما ووصفت تقارير اخرى مرضه بالخبر الكاذب وقالت انه يواصل قيادة قواته. وقال مبعوث الأمم المتحدة الى ليبيا، غسان سلامة باللي هدر معاه فالتلفون وانه ناقش معاه “الوضع العام في ليبيا والتطورات السياسية في هذا البلد”.
دابا هاد الشي ما شادش. مازال مابانش ما بانش راه محسوب من الميتين.
وفاتو فصالح المغرب. حقاش حفتر كان اكبر معارض لاتفاق الصخيرات اللي كان رعاتو الامم المتحدة عندنا. هاد الاتفاق عطى حكومة وفاق وطني وربحها وفائز السراج للي المنتظم الدولي اعترف بيه. هاد الحكومة شادة غرب ليبيا بينما الشرق. بنغازي واللي حداها بقات تحت قيادة قوات حفتر. كما انه رفض ان يخضع جيشه لهذه الحكومة وديما كيقلب على مجلس عسكري يحكم ليبيا ويكون هو رئيسو.
رحيلو كيعني ضربة للامارات العربية المتحدة اللي كان هادا هو رجلها. الامارات وظفاتو باش تضرب قطر اللي دعمات الجماعات الاسلامية. ماشي صدفة ان حفتر دكدك هاد الجماعات وجرا عليها من بنغازي.
من لحوايج اللي خلى المغرب عندو علاقة شوية فاترة مع المغرب هو هاد الملف الليبي. ايلى بصاح ودع هاد حفتر غادي يتقلص نفوذ الاماراتيين ويتقوى دور الوساطة المغربي
المغرب بدا باش يتوسع اتفاق الصخيرات ليشمل شرق ليبيا. هاد الشي كيخصو لاعب اساسي فالملف الليبي هو فرنسا. هاد الشي اكيد كان فاللقاء اللي عقدو الملك محمد السادس مع الرئيس الفرنسي ايمانويل ماكرون فبداية الاسبوع اللي كنودعوه. فرنسا ايلى قبلات هاد الشي اما اتفاقية جديدة او تطوير الاتفاقية الحالية وربما جولات جديدة فالصخيرات غادي يرجع المغرب للواجهة. غادي يرجع قوي.
طبعا هاد التحرك غادي يقلق اكثر من واحد. يقلق الجزائر يقلق الامارات ويبرزط حتى مصر واخا المغرب ما عندوش اطماع فهاد الدولة