اوريد فجيهة والياس العماري ومنتصر حمادة وطه عبد الرحمان فالجيهة لخرا: الاول كيحتارمك ولخراين كيتلفوك ويتلفو الفتيات اللي قريتي

تدوينة للاستاذ الباحث عبد اللطيف اگنوش ///
والله ماعرفت علاش!!!
شوفو غا الفرق دابا بين حسن أوريد مللي كايكتب، وإلياس العماري ولا منتصر حمادة ولا طه ولد عبد الرحمان مللي كايكتبو وكاينشرو!
حسن أوريد ما كاتحيرش معاه…كاتقراه كاتلقى الراجل محتارم ليك مناهج ومساطر التفكير والكتابة والإلقاء وإيصال الأفكار للقارئ…السيد من السطر اللول كايموت المش…كايدير معاك “دفتر تحملات”، يعني “كونطرادا”…بغا يكتب ليك على “ضرورة الثورة الثقافية في المغرب”، عطاك آشنو كايعني بالثقافة، وبالثورة، وعلاش اختار يتكلم عليها، وقال ليك أنه كايدافع على هاذ المشروع لأنه هو الوحيد للي يمكن ليه يضمن ظهور “أمة مغربية” متصالحة مع الزمن التاريخي والسياسي الدولي الحالي، ومستاعدة للمغامرات التاريخية الممكنة…فكان والحالة هذه، من السهل أنك تقرا كتاب الأستاذ حسن أوريد، وتعرفو فين غادي، وتعرفو بأنه مسؤول على كلامو، وتقدر تتحاور معاه وتعطي رأيك انطلاقا من نفس التعاريف والمسلمات للي مشى منها، طبقا للفرضيات للي نتا كاتشوفها ماتطررقش ليها في الكتاب ديالو، ولكنها كاتصب مباشرة في موضوعو.
أما، الله يستر، تقرا كتاب إلياس العماري أو كتابات منتصر حمادة أو طه ولد عبد الرحمان الدكالي، والله حتى يسططيوك ويتللفو ليك كًاع ذيك الفتيات للي قريتيها وعللموها ليك…مايعطيك تعاريف، ما يوضع ليك فرضيات البحث، ما والو..الراجل غا كايخطب…الراجل كاينققز من الزبالة للطيفور، بلا مايعلمك بلا مايقولها ليك، حتى كاتندم أنك بديتي تقراه كًاع.
وهنا كانتساءل: علاش جوج دالأصناف ديال المغاربة، عايشين في بلاد وحدة، تلققاو تقريبا نفس التربية، وقراو تقريبا في نفس المدرسة، علاش البعض منهوم بعقلو مللي كايكتب، وعلاش البعض الآخر طاير ليه الفرييخ وزايدها بالتعالي من فراغ؟؟؟
واش الفرق في اللغة ديال التدريس؟؟ واش الفرق في كيفية التدريس للي تلققاو بيه العلم والمعرفة؟؟؟