على ما ڭالو، حاليا كاين 8 دالمليون ديال المغربيات للي مازالين عازبات. هاد الرقم مكيفاجئنيش حيث أنا عندي 31 عام و بزاف ديال صحاباتي مزال متجوجو. كاينين للي كيرفضو يتزوجو ولكن الأغلبية مكرهاتش غير مالقاتش معامن. كمحاولة لتفسير هاد الظاهرة، كاين للي تيڭول بللي الدريات ولاَّو عندهم بزاف ديال الحقوق و ولاَّ تيبان ليهم النجاح المهني أهم من الجواج و تكوين أسرة، و كاين للي تيڭول بللي الوقت غلات والجواج خاصو الفلوس. أنا مامتفقاش مع هاد التفسير، حيث كاين للي مقودة عليه و مجوج و ساكن مع طاشمة ديال الدراري تحت كروسة ديال البطاطا، و كاينات للي شادين مناصب عليا و فنفس الوقت عندهم عائلة و كلشي بخير. فنظري كثرو البايرات حيث المجتمع تطور بسرعة كبيرة فالعقود اللخرة، في حين الأدمغة بقات واحلة فالعصر الحجري. كيف ما ڭلت ليكم فمقال سابق، العلاقات بين الجنسين مبنية على صفقة الجنس مقابل الموارد: المرا كتجوج بأغنى رجل ممكن و فالمقابل كتنعس معاه غير هو و كتولد معاه غير هو حيث الحمل و الولادة كيشكلو ليها خطر و إعاقة و خاصها تلقى للي يوكلها و يحميها. هاد البلان كانت خدامة بيه البشرية لآلاف السنين فالوقت للي كانو الجنس و الفلوس عندهم شيء من الندرة. كانت المرا كتجمع رجليها و كاتحافظ على السمعة ديالها باش تجيب أحسن رجل ممكن، و الراجل حتاهوا كان تيدمر و يتقاتل باش يوصل لقمة التسلسل الهرمي و يختال المرا للي بغا. كلشي تبدل في أقل من قرن. حيث العيالات ولاَّو تيخدمو، القدرة على توفير المصروف مبقاتش حكر على الرجال، و بالتالي الراجل مابقاش كيعيبو غير جيبو، ولاَّ كيعيبو وجهو و ريحتو و قرايتو و طريقتو فالمشي و الهدرة و النيك. الراجل للي عندو غير باش يضمن الضروريات ما بقاتش عندو قيمة، خاصو دابا يبدل مجهودات أكبر باش تقبلو شي وحدة في المستوى، مع العلم أن العيالات كتجيهم معيورة يتقدم ليهم شي واحد كيشد قل منهم فالصاليرو كيفضلو يبيرو فبلاصة ما يطيحو النيڢو. المشكل هو المغاربة ماواكبوش هاد التطور و باقين تايآمنو بمقولة “الراجل كايعيبو غير جيبو”، و متيقين ماماهم للي ڭالت ليهم بللي وجودهم على كوكب الأرض كافي باش يتمناوهم الحور العين. من جهة أخرى، الدريات ليوم كايمارسو حريتهم الجنسية كيفما بغاو. الأمر جميل فحد ذاتو و لكن عندو عواقب للي القليل تيعتارف بيها. الحافز الأول ديال الجواج عند الرجال هو الجنس، و دابا مني النيك ولاَّ ساهل، الفئة ديال الرجال للي كتعجب العيالات (الصحاح، الباڭص، للي عندهم الفلوس و قاريين) ما عندهاش علاش تصدع راسها بالجواج حيث من الساهل عليهم ينعسو مع أي وحدة بغاوها. بحال هادو حتى كتولي عندهم 50 عام عاد كيفكرو يستاقرو مع بنت 25 عام. شناهوا الحل؟ الحل هو الواحد يتجاوز الغرائز دياولو و يحقق مكانتو على حساب المجتمع للي عايش فيه و هاد الشي صالح لكلا الجنسين.
