هنا موسكو. كلشي كيوجد لعراسية المونديال: الشطيح والموسيقى فالشوارع والروس خدامين باش يدوزو كاس العالم فاعل تارك والساحة لحمرا ولات ملتقى الشعوب =صور

الحركة فموسكو غادية وتكبر. الرواج كثر. الحياة تزادت فشوارع العاصمة الروسية. فحاناتها. فمقاهيها. فمطاعها. فميترو ديالها. في شارع اربات٬ احد اكثر الشوارع حياة وسط موسكو٬ كانت جماعات في الصباح ترقص على موسيقى الفيس بريسلي. شارع فيه اكثر من 7 مجموعات كل مجموعة مكونة من سبعة الى عشرة ازواج =رجل ومرأة= كيشطحو على الروك اند رول. ماشي غير الموسيقى اللي امريكية وسط عاصمة الاتحاد السوفياتي سابقا وروسيا اليوم٬ بل حتى اللباس يعود للستينات وفترة من السبعينات. من يشاهد المنظر يخيل له انه في مسابقة باحدى المدن الامريكية لا في العاصمة الروسية.
من “اربات” في اتجاه الساحة الحمراء كاينة حيوات ماشي غير حياة. ها اللي كيغني ها اللي كيعزف. ما يمكنش تحس بالملل. كاينة حياة. وكاينة نوع من الاحساس بالاطمئنان كيشعر بها الزائر. جا من تصرف سكان هاد المدينة المليونية. مشهد جوج بنات كيلعبو المسايفة ففضاء مفتوح باحد الازقة المتفرعة عن “اربات” كيزيد يزين الصورة
الروس وحجاج المونديال تفاعلو مع هذا المنظر. شي يشطح شي يصور شي حال فمو مبهر. فهاد الشارع كتعطى صورة علي اللي كتشهدو موسكو هاد الايام. ماشي تسويق موسيقى ار تبطت بامريكا. للا. بل تسويق شعب منفتح. مختلف عن الصورة النمطية اللي طالما تروجات عليه فافلام هوليود: معقد وبارد المشاعر ولا يتواصل مع الاخر ويعتبره عدوا له. ابدا هاديك لكليشيهات اللي اثرات فشعوب كثيرة كيظهر عكسها تماما فتعامل السكان.
اللي تالف فالميترو ولا دايخ علي شي بلاصة فالشارع ولا باغي يسول على شي حاجة كتلقى سكان موسكو مستعدين وبابتسامة يخدموك. يوريورك. بنات ولاد. كبار. صغار. كلشي كيف عاينات “كود” باغي يخدم حتى اللي ما عندوش مع الكورة. طبعا عندو مع بلادو.
الساحة الحمراء الشهيرة بالاستعراضات العسكرية التاريخية ايام السوفيات وساحة استعراض الروس لقوتهم ولات مهرجان لتلاقي الشعوب. الشعوب المشاركة فكاس العالم. امريكا اللاتينية لحد الان دايرة نشاط خاص. اليوروغواي البارح شطحو وغناو وفرحو ونشطو معاهم جمهور الفرق الاخرى. الايرانيون كانو حاضرين بحال المغاربة. بروح رياضية كتحس عند هاد الناس الرغبة ينشطو كثر من منتخبهم يربح ضد هاد المنتخب او ذاك. هاد الشي اللي بان فلقاء كود مع الجمهور الايراني. للاشارة فالمغرب غادي يواجه فاول ماتش يوم 15 يونيو المنتخب الايراني فسان بيتيرسبورغ. الجمهور كيدوز هنا شوية الوقت قبل ما يسافر لهاد المدينة. لمغاربة حاضرين. “كود” تلاقات واحد من العشرات البارح. جا هادي اسبوع وكيخدم فالانترنيت. وجد راسو باش يحضر للماتشات الثلاثة وحتى ايلى تاهل المنتخب المغربي للدور الثاني موجد راسو باش يبقى. هادا ما معولش على الواليدة ترسل ليه اللعاقة.
حركية الروس فموسكو ما بايناش غير فنشاطهم. لمدنية كلها كتحس بيها محركة. ناطحات السحاب وديال بصاح كيطلع قرب فضاء المعارض اللي فيه مؤتمر الفيفا وغدا غادي يتم التصويت فيه على شكون اللي غادي يحتاضن مونديال 2026 بين المغرب من جهة وامريكا وكندا والمكسيك من جهة ثانية. موسكو فيها الهندسة الجميلة ايام روسيا القيصرية. كان النظام الشيوعي قد حافظ عليها. تتعايش مع الهندسة الاقل جمالا اللي بانت فالحقبة الشيوعية مع الهندسة العصرية، هندسة مرحلة بوتين. هاد الجمالية المعمارية بقات عبر الحفاظ على هاد الجزء من تاريخ روسيا.
شعب تحس بيه فرحان بهاد الحدث. فرحان ببلادو. فرحان ومفتاخر بهويتو. مبتسم. راشقة ليه. كتحس بللي كلشي باغي يساهم باش يدوز المونديال دالفريع.