انفراد. المنسق العام لماتش البارصا اشبيلية خرج ف”كود”: التنظيم كان مزيان ديال الماتش وها فين وقع المشكل اللي خارج على اختصاصنا واللي نقزو راه كان عندهم تذاكر

ناض نقاش كبير فالمغرب فوسائل التواصل الاجتماعي بالمغرب او اسبانيا بخصوص ماتش البارصا واشبيلية نهار الاحد اللي فات بطنجة حول التنظيم. الصبليون شادين فرئيس جامعهم وشي باغينو يستاقل وشي بغاوه يتكلم ويشرح. لمغاربة كيتكلمو على التنظيم وفضايحو.
كود” سولات معاد حجي المنسق العام لماتش البارصا ضد اشبيلية حول هاد الموضوع. المسؤول اكد ل”كود” ان هناك مبالغة كبيرة من قبل وسائل التواصل الاجتماعي لدرجة ان بعضهم يضيف قبل ما يبدى الماتش بساعات كان كينشر تويتات وتدوينات سلبية بزاف وهو مازال ما شاف والو.
المسؤول اكد ل”كود” ان لجنة التنظيم خدمات مزيان ودارت مجهود كبير باش يبرك قرابة 40 الف من الجمهور فبلاصاتو. كما اوضح ل”كود” ان من بين نجاح الجانب التنظيمي هو ان البعض وصل قبل نصف ساعة ودخل للماتش بدون مشاكل.
وفي سؤال ل”كود” حول الفيديو اللي فيه الجمهور كينقز من الكرياج قال حجي “كلشي كان مزيان. وقع مشكل فالتوركيني ديال الباب 7. ما بقاش كيقرا الكود بار ديال التذاكر. هاديك الساعة كان خاص قرار واش يولي توركيني ليبر ولا اللا. حقاش هاد التوركيني بيه كنعرفو واش لوراق مزورين ولا اللا. لانه لقينا بعض التذاكر فالصو” يحكي حجي ل”كود”.
المنسق العام قال ل”كود” انه كمشرف علي التنظيم كان موجد “بلان بي”. يتعلق الامر بناس الامن الخاص عندهم دراية بالتذاكر المزورة كيقدرو يقلبوها غير بيديهم ويعرفوها. اللجوء الى هاد الحل “يتطلب شي ربع ساعة” يحكي معاد حجي ل”كود”. غير ربع ساعة فماتش قرب يلعب كيطول الصف وكينوضو مشاكل وعليه اضاف “هنا باش شي وحدين نقزو لكرياج”. المسؤول اكد ل”كود” باللي هادوك ما سالتينش “حقاش قبل ما يوصلو للمعلب كانت اجراءات سابقة باش ما يدخل الا اللي عندو التذكرة.
معاد حجي اعاد التأكيد ان الماتش داز فظروف مزيانة وكلشي كان فيه منظم باستثناء هاد المشكل اللي عندو علاقة ب”التوريكيني” اللي قليل بزاف فهاد الملعب. كما شدد على ان الجامعة الملكية لكرة القدم دارت خدمة كبيرة بزاف فوقت قصير باش كلشي يكون مزيان مشيرا الى تعاون ولاية جهة طنجة تطوان الحسيمة.
بخصوص غياب الماء في بعض الطواليط قال حجي ل”كود” “درنا على كلشي. جبنا متطوعين مغاربة وافارقة باش يسهلو دخول الجمهور. جبنا طوبيسات باش ينقلو الجمهور. جابو 5 الاف قبل الماتش ونقلو 20 الف بعد الماتش. درنا تنشيط خارج الملعب. درنا على جميع المرافق الخاصة بالملعب بما فيهم المراحيض وكان فيهم الما. وشددنا باش الطواليط يكونو نقايا وفكل وحدة كانت سيدة مكلفة”. معاذ اكد “راه هاد الشي ماشي شغلنا ودرناه. هادي مسؤولية سونارجيس لانها هي المكلفة بادارة الملاعب.