شكون يستاحق الاولوية فالعفو: واش شباب الحراك ولا اللي تحكمو فقضايا الارهاب والتطرف. كثار هما لمغاربة اللي مازال ما فهموش علاش 300 عام لناس طالبو بحقوقهم فالريف

مرة اخرى كلشي تسنى يكون العفو فذكرى ثورة الملك والشعب يقدر يكون فيه العفو على ناصر الزفزافي قائد حراك الريف وشباب خرجو كيطالبو بحقوق مدينتهم. منطقتهم.كثار من الحقوقيين والسياسيين والنقابيين والكتاب والمواطنين كانو كيتسناو شي التفاتة لهاد الشباب اللي تعرضو للظلم وعطاوهم 300 عام. شي عفو ملكي يوجد الطريق للمصالحة مع منطقة واخا يدار فيها اللي دار ما عمرهم ينساو ما عاشوه طيلة وبعد الحراك الشهير.
البارح اعلن عن بيان لوزارة العدل ان الملك محمد السادس اصدر عفوا على 22 سجينا من بين المحكوم عليهم في قضايا التطرف والإرهاب.
التبرير اللي عطاوه ان هادو شاركو “في الدورة الثانية من برنامج “مصالحة” الرامي إلى إعادة إدماج هؤلاء السجناء ومصالحتهم مع المجتمع، والمنجز بشراكة بين المندوبية العامة لإدارة السجون وإعادة الإدماج، ووزارة الدولة المكلفة بحقوق الإنسان، ووزارة العدل، ووزارة الأوقاف والشؤون الإسلامية، والمجلس الأعلى للسلطة القضائية، ورئاسة النيابة العامة، والمجلس الوطني لحقوق الإنسان، والرابطة المحمدية للعلماء، ومؤسسة محمد السادس لإعادة إدماج السجناء”. واضاف البيان ان هادو رفعوا ملتمسات العفو للملك وراجعو “مواقفهم وتوجهاتهم الفكرية، وأعلنوا بشكل رسمي نبذهم لكل أنواع التطرف والإرهاب، وتشبثهم القوي بثوابت ومقدسات الأمة، وتعلقهم الراسخ بالمؤسسات الوطنية”.
هادو كيتوزعو ما بين: 17 سجينا العفو مما تبقى من العقوبة السجنية
3 تحول ليهم السجن من المؤبد للمحدد
و2 تم تخفيض العقوبة السجنية
طبعا هاد العفو ما كانش عندو الاثر لكبير اللي كان غادي يتركو العفو على اصحاب الزفزافي. فكل مناسبة كيكثر الامل في عفو ممكن. هاد الشي خلى الاولوية فهاد العفو تكون من صالح هاد الشباب ماشي لغيرهم.
هاد العفو كان يقدر يكون حدث مهم خاصة ان من بين اللي خداو العفو كاين بلعيرج وكاين يوسف اوصالح الكاتب المحلي لحزب العدالة والتنمية بسيدي الطيبي اللي تحكم عليه ب22 عام فاحداث 16 ماي 2003 ودوز 15 عام فالقنيطرة٬ ولكن غادي يفرح غير عائلاتهم حقاش كاين معتقلي حراك الريف اللي كلشي كيتسنى وقتاش ياخدو العفو. كلشي كيطلب عليهم اخرهم نجلة عبد الكريم الخطابي فعيد العرش الاخير.
مرة اخرى تزگلات مناسبة. مناسبة تعتبر مدخل لمصالحة جديدة مع الريف. هاد المصالحة صعيبة ولكن خاصها تتحقق. مشاريع منارة المتوسط وغيرها ما غادية دير والو بلا هاد الخطوة