مقرب من الأزمي ل”كود”: عمدة فاس ماشي حيط قصير باش يسبوه ويضربو ليه فالعرض ديالو وزمن الفساد انتهى وها علاش دايرين عليه هادشي

حملة كبيرة دايرها شي فئة هاد الأيام على عمدة مدينة فاس، إدريس الأزمي الإدريسي. كولشي عارف أن هاد الحملة وراءها أيادي خفية تحركها شي جهات معروفة وكتحاول جاهدة تشوّه السيد وتسبو وتضرب ليه فالأعراض ديالو. نقدو نتافقو مع هاد الجهات يلا كانت تنتقذ التسيير ديال الأزمي بطريقة معقولة وبلا خلفيات سياسية مفروشة عند كولشي.
وحسب مقرب من الأزمي، ل”كود”، فإن هذا الأخير كان ساكت بزاف على هاد الحملة اللي كتحمل كولها السب والقذف فحقو لكن دبا قرر باش مغاديش يسكت على هادشي وغادي يمشي بعيد بزاف. وأضاف المصدر نفسه، قائلاً: “سي ادريس ماشي حيط قصير باش يسبوه او يضربو ليه فالعرض ديالو ومن دبا الفوق مكاينش تساهل مع هاد الجهات”.
وبخصوص علاش بالضبط كاين هاد الحملة على الأزمي بالذات، يشرح مصدر “كود” المقرب من عمدة فاس: “هاد الجهات اللّي كشتن عليه حملة مغرضة كانت تستفيد من امتيازات غير مشروعة مع المجلس السابق من قبيل ابتزاز المقاولين والمنعشين العقاريين وغيرها من أساليب الفساد ودبا مني مشات البزولة ناضو يغوتو وكيقولو حقا المدينة قتلها الأزمي حقا هو سبابها وغيرها”.
وكان عمد فاس قد أكد في حوار سابق مع “كود” أنه غادي يستمر فخدمة فاس ومغاديش يرضخ للابتزاز والتشويش، مضيفا بالقول: “سنواجه بكل قوة وعزم هذه الحملات المغرضة بكل الوسائل القانونية المتاحة وبالعمل الجاد وسنفضح المقامرين بسمعة المدينة”.