عاجل. تأجيل انتخاب عمدة المحمدية بسباب النصاب. البي جي دي ما جاوش كاملين ومشثتين وتشمتو

علمت “كود” ان انتخابات اختيار رئيس مجلس البلدي بالمحمدية اللي كانت اليوم فالصباح ما دارتش. السبب وفق مصدر ل”كود” ان مستشاري التجمع الوطني للاحرار والاصالة والمعاصرة و6 من العدالة والتنمية ما جاوش. علاش؟ باش ما يكونش النصاب وما تمش الانتخابات اللي كان مرشح ليها للرئاسة البي جي دي فشخص ايمان صابر والتجمع الوطني للاحرار فشخص العطواني.
دابا باينة باللي الاحرار دارو حساباتهم ولقاو راسهم مازال ما ضامنينش الرباح ودارو هاد الاستراتيجية. عمليا وفق القانون المنظم لهاد الانتخابات٬ غدا غادي يكون موعد الانتخابات.
هاد الانتخابات فيها رهان وطني واخا ماشي مهمة بزاف حقاش الرئيس اللي كاين غادي يكمل غير عامين. كاين استعراض لكل حزب لقوتو. الضحية فهاد الصراع هو حزب الاتحاد الاشتراكي. حقاش كيعيش انقسام كبير بزاف. مزوازي واللي معاه مشى مع العطواني ونسى اش دار هاد الرئيس لحزبو. وهوب وصحابو فنفس الحزب رافضين رفض تام يصوتو على العطواني.
ادريس لشكر الكاتب الاول للحزب وعبد الحميد لجماهري القيادي في الحزب بجوجهم دخلو فاخر لحظة باش يبقى حزبهم موحد. قالو ليهم وفق مصدر “كود” “غدا غادي يطلع هاد الحزب او داك وغاديين حنا نخسرو. خاصكم تبقاو متوحدين. مجتماعين. قوتنا نبقاو مجتماعين”. لشكر شرح لاعضاء الحزب “التحالف الاستراتيجي مع الاحرار”. اكد باللي الوضعية الحالية خاص الاتحاديين فالمحمدية يقدروها. بعض المستشارين ما متفافقينش اصلا علي “التحليل السياسي للمرحلة”.
قيادي اتحادي قال ل”كود” “اودي راه الحزب خاصو يبقى مجموع وهادوك راهم كيضاربو على العقار ماشي على السياسة”
بعد الاتحاد الاشتراكي كاين الحزب اللي طلع غبي بزاف هو العدالة والتنمية. حقاش قبل ما يتاخد الامين العام للحزب سعد الدين العثماني قرار باش ما يبقاش عنترة رئيسا للمجلس البلدي للمحمدية كان دار اتفاق باش يبقى فالرئاسة. دابا تقولب. الحزب عندو 22 صوت. محتاج لجوج اصوات ويدي الرئاسة وهادو كاينين وكاين اكثر غير مع الاتحاد الاشتراكي فشخص وهوب الاستاذ الجامعي بكلية الاداب بنمسيك وصحابو.
لكن عنترة اللي حاس بالشمتة باغي ينتاقم من الحزب وباغي يصوت للعطواني اللي كان داعمو ف2003 ومع عنترة كاينين علي الاقل خمسة المستشارين لحد الان.
لو هادوك حضرو اليوم فهاد الانتخابات كانت الرئاسة تكون للبيجيدي.