على من كتضحك يا السي ادريس لشكر. ريبتي حزب وكتقول الماضي فات والمساميح كريم. دار بحال باروديا لحسن الفد دا لخوه ارضو ومراتو وجا يطلب منو السماحة بلا ما يرجع ليه شي حاجة =فيديو

ادريس لشكر الكاتب الاول لحزب الاتحاد الاشتراكي عزيز عليه التنوعير السياسي. كيموت عليه. غير هو ماشي ديما كيجيبها لاصقة. خرجتو ف”شوف تيفي” وللي دعا فيها كاع الاتحاديين يرجعو للحزب والمساميح كريم والماضي فات وحنا اولاد اليوم ووو غير تخربيقة. هادي ماشي هدرنا ف”كود” بل هدرة قياديين اتحاديين.
وفق قيادي اتحادي ل”كود” فهاد الخرجة الاعلامية “مثيرة للسخرية من الاتحاديين” المصدر اكد ل”كود” ان “ادريس مازال مفهمش أو مبغاش يفهم بلي المشكل فالاتحاد اليوم هو تواجده ككاتب أول لهاد الحزب العريق وبلي الناس لي غادراتو فالمؤتمر التاسع بحال دومو وطارق القباج ما مشاوش لأنه طردهم بالعكس راه عيا ما يزاوك فالشامي باش يكون فالمكتب السياسي ورفض، الناس مشات لأنها رفضت الطريقة باش جا بها للكتابة الأولى ومرضاتش لحزب يضم أطر فمستوى عالي يكون عليهم ادريس لشكر المعروف بطريقته البدائية فالتدبير يكون زعيم عليها”.
قيادي اخر فنفس الحزب اكد ل”كود” انو “البارح لشكر قالك أنه يصدر عفوا شاملا على كل من طالتهم القرارات التأديبية وملي سولنا على شحال ديال الناس تم طردهم أو تجميد عضويتهم لقينا أن الأمر لا يتجاوز خمسة د الناس وهذا يعني أن الكاتب الأول اما كيضحك على الاتحاديين يا إما غير بغا يتقوى بالغاضبين بعدما حس انه لم يعد مرغوبا فيه” واضاف “هاد التصريح “غضب الاتحاديين” حقاش عارفينو باللي “قرار فردي يكرس استبداد الكاتب الأول لي كيتصرف فالحزب وكأنه ملكية خاصة له”.
لشكر فالحقيقة كيشبه لواحد الحلقة =باروديا دارها حسن الفد على الخيط لبيض اللي كانت كتقدمو نسيمة الحر فدوزيم”٬ الفد فهاد الحلقة كيمثل فلاح دا لخوه 80 گطار دالارض وماكينات حصاد ودراس وحتى لمرا وجاي للبرنامج يطلب السماحة. طبعا غير السماحة بلا ما يرجع اللي دا. هادا هو ادريس لشكر مع الاتحاديين اليوم. دا ليهم حزب وضرب قيادات تاريخية وشوه تاريخهم ونوضها مع كلشي وجا بدعم صاحبو الياس العماري وكاينين فيديوات كتؤرخ لهاد الشي فالمؤتمر اللي ربح فيه بزز الراحل احمد الزايدي. اليوم باغي يقول الماضي فات. هاكاوا كي درتي ليها