علاش المسلمين ما تعاطفوش مع مقتل المسيحيين فسريلانكا كيف ما تعاطفو المسيحيين مع المسلمين فجريمة نيوزلندا الارهابية؟ رفيقي ل”كود”: ما متشبعينش بثقافة التعدد والتسامح وها اللي خاص يتغير

اليوم ارتافع عدد قتلى الهجومات الارهابية اللي ضربات سريلانكا الى 359 قتيل. الهجوم تبناتو داعش وبرراتو بالثأر لحادث الهجوم الارهابي بالسلاح على جامع فنيوزلندا مؤخرا من قبل يميني متطرف من استراليا.
اللي بان هو ان المسلمين ما بينوش تضامن مع هاد الحادث الارهابي اللي استهدف مسيحيين فالكنائس والفنادق كيما بينوه المسيحيين مع المسلمين بعد حادث مسجد نيوزلندا. “كود” سولات محمد عبد الوهاب رفيقي الباحث والشيخ اللي دار مراجعات كثيرة على تفسير هاد الشي.
بالنسبة لرفيقي فتصريحو ل”كود” فهاد الشي كيوقع ماشي غير فهاد القضية بل فجميع القضايا اللي كيكونو فيها المسلمين مستهدفين اذ كيكون بزافت التعاطف. كما لاحظ ان العكس كيوقع. ايلى كان حادث ارهابي دارو مسلم ضد المسيحيين او غيرهم ما كيكونش نفس التعاطف. رفيقي وضح باللي كيكون الاستنكار ولكن بلا ما يوصل للحشد الشعبي والعاطفة الجارفة كيف ما وقع فنيوزلندا.
هاد الشي عندو اسبابو يشرح رفيقي ل”كود”٬ فمجتماتنا المسلمة واخا كيكونو ضد الارهاب او لا ما متافقينش معاه ما كيكونش عندهم نفس ردة فعل المجتمعات الغربية حقاش “غير مشبعين بثقافة التسامح والتعدد وبالتالي ما كيكونش رد الفعل” يوضح رفيقي ل”كود”.
النقطة الثانية اللي شرحها ل”كود” تتعلق بالعقلية وبالثقافة٬ اذ اكد انه لازم يتغيرو بجوج حقاش “ما كيمكنش ليك غير تكون ضد الارهاب وكتدين الارهاب ولكن خاص “داخليا نفسيا خاص تكون قطيعة مع اي حاجة عندها علاقة بالارهاب” اي خاص “مفاصلة نفسية حادة جدا مع اي حاجة عندها علاقة بالارهاب وهادا للاسف الشديد ما كينش فالمجتمعات ديالنا” يختم رفيقي