المغرب ناميبيا. ماتش تخلطات فيه الكورة بالهوية بالسياسة. لمغاربة باغيين فرحة ترفع راسهم وعدميين منا باغيين كبوة باش يلقاو ما يكتبو فالفايس

باش يخرج لعاب متشبث باصولو الامازيغية فرحان بيها وعاشق لاغاني ولد بلادو رويشة بحال فيصل فجر ويدير تصريح ل”فرانس فوتبول” كيقول فيه باللي “مستعد نموت على بلادي” وباللي “هاد الشعور بالانتماء كيجري فدمي وكيتزاد باش نلبس توني المنتخب”٬ كيظهر حاجة وحدة.
هاد اللعابة ما لاعبينش كأس افريقيا للامم وصافي. ما لاعبينش الكورة. لاعبين اكثر من ذلك. لان غالبية لعابة الاسود تولدو فالخارج خاصة فرنسا وهولندا وبلجيكا واسبانيا٬ فالكورة واختيار المنتخب ما عندوش علاقة غير بالجلدة٬ فيه اجوبة على سؤال الهوية والانتماء ديال هاد اللعابة ومعاه ديال 5 مليون من اصل مغربي كيعيشو دابا فالخارج.
فهاد الدورة ديال كأس افريقيا الوضع شوية حساس. لبلاد كلها ضاغطة على هاد المنتخب. تزادت قضية عكرات على الجو هي ديال حمد الله. فيها تعاود نقاش ازلي ما عمرو يسالي. علاش اللاعب المحلي اللا. علاش كلشي من برا. واخا من وجهة نظري نقاش خاوي. حقاش الفرق كبير بين اللي بنى علي التكوين الصحيح وبين اللي عا غادي وصافي. عوض ما الفرق الوطنية تغير اسلوبها فالتكوين كتقلب علي الساهلة. طبيعي ما يكونوش من البطولة لعابة محليين بالعدد الكافي. غير هو هاد النقاش ماشي كروي فحد ذاتو.
كيطرحوه ناس عندهم توجه فكري معين. محافظون يعيشون علي امجاد الماضي. السلف الصالح او منتخب السبعينات والثمانينات. المهم الحلول عندهم لكل مشاكل الحاضر كاينة فالماضي. فيهم القوميون وفيهم الاسلاميون وبقايا اليسار الراديكالي اللي كيتلاقى معاهم فكثير من النقاط.
اصحاب هاد الافكار باغيين المنتخب يخسر باش يكتبو فالفايس: اش كلنا ليكم. راه ما يمكنش المنتخب يمشي بعيد بلا اللاعب المحلي ورجعو لينا الزاكي….. هادو كيشوفو المنتخب الحالي بقيادة رونار بحال شي استمرارية لهيمنة الفكر الفرنكفوني على المغرب. ديما عندهم البروجيكسيون ديال مشاكل المغرب مع اي نقاش وخصوصا كرة القدم.
ما كرهاتش هاد الفئة ما يلبس حتى واحد التوني حتى يهدر العربية ومع الوقت يقدرو يزيدو حتى الصلاة.
فئة من هاد الناس باغيين المغرب ما يدير والو فهاد الكان. فيهم اللي باغي الكان كولو يوقع فيه شي حاجة بسباب وفاة الرئيس المنتخب المعزول محمد مرسي اللي كيعتابروه شهيد.
كاين مغاربة خراين باغيين هاد المنتخب يربح باش يعطي الامل. باش يرجع الروح والفرحة لشعب محتاجها. باش يخلق ديك اللحمة بين مغاربة المغرب ومغاربة العالم. مع الوضع اللي كاين فالبلاد محتاجين فرحة تسعدهم.
اليوم بملعب السلام كاين اول ماتش للمنتخب ضد نامبيا فكاس افريقيا. غير هو كل واحد كيفاش كيشوفو. المغرب محتاج ل3 نقاط باش يكمل الطريق ومعاه يستمر النقاش ديال الكورة اللي غادي ويبعد عليها كرياضة ويقرب منها كاداة سياسية اجتماعية ثقافية لدولة كلها