توقع. التقدم والاشتراكية مازال التران جاي ليه. غادي يبقى بلا صحة بلا سكنى ولفتيت تقدر ديرها بيه الصحة وكتاب الدولة غاديين يطيرو

التعديل الحكومي بالنظر الى التحالف القائم ما غاديش يكون كبير بزاف بزاف. غادي يقادو التقابي اللي عرفاتها حكومة بنعرفة من نهار بدات. حكومة تالفة دايخة. القطاعات اللي هدر عليهم الملك فخطابو البارح وحسب الاولوية هما التعليم الصحة فالمقال الاول. الصحة قبل كاع.
عضو التقدم والاشتراكية انس الدكالي وزير الصحة يمكن عارف راسو غادي يمشي من نهار عوض الحسين الوردي. القطاع تزاد تكرفص. اضرابات طلبة الطب عراتو. مقاومة الاطباء ديال القطاع الخاص اللي نسبة فيهم بزنازة وغالبيتهم ما كيخلصوش ضرائبهم لمشروع الدولة زاد ضعفو.
وزير ما صدقش.
وزير التربية والتعليم يقدر يمشي فيها حتى هو. يمكن جابوه باش يربح التصويت علي مشروع القانون الاطار الخاصة بالتربية والتكوين. هاذا احتمال يجي فيه تران التغيير الحكومي غير هو ماشي بحال اللي غادي يجي فوزير الصحة.
وزير اخر من حزب الكتاب يقدر يجي فيه التران هو وزير السكنى وسياسة المدينة عبد الاحد الفاسي الفهري يقدر يدخل فيه تران التغيير
من الوزراء اللي من المحتمل يتغيرو ولكن مرتبط بحالتو الصحية هو عبد الوافي لفتيت وزير الداخلية. دار عملية قاصحة على قلبو فالمغرب وفشلات ومشى لفرانسا وعاودها. اييه رجع ولكن وزير الداخلية عليه الضغط وخاص وزير قوي بدنيا بالاضافة الى قوتو فالخدمة.
كتاب الدولة كلهم غاديين يطيرو. التجربة تبتات فشلهم. ما صالحين والو. ما عندهم ما يديرو. الريع وصافي. كياخدو فلوس الدولة وصافي. شرفات افيلال اللي كانت كتحرك فقطاع الماء طيرها وزير التجهيز والنقل عمارة عبد القادر
ممكن شي كاتب دولة او كاتبة دولة تولي وزيرة او وزير. كاين احتمال عند وحدة بحال لمياء بوطالب. هي احسن من وزير السياحة والنقل محمد ساجيد اللي غير زايد وصافي.
ما صدقش كوزير