لي بغا يقرا التاريخ و الجغرافيا و الدراسات الاسلامية الله يكمل عليه بيخير غير هوا مايجيش يبكي على الدولة باش تخدمو من بعد ! سوق الشغل بغا كفائات عالية و منتجة ! بغا التقنيين ! و بغا الناس لي عندها اللغات و قادرة تساير فعصر الذكاء الاصطناعي

اولا و قبل كل شيء خلينا نتافقو على انه لي عندو عندو ! و لي فيه النفس راه كايجيب لقمتو من فم السبع ! و لي خامل فاشل راه غايبقا حياتو كاملة كايقلب على شماعة يعلق عليها الفشل ديالو ! و خليونا نتافقو على حاجة اخرى : الحياة اختيارات و كل واحد حر يختار شنو بغا و لكن خاص كل واحد يتحمل مسؤولية اختياراته.
القراية فالمغرب مازال عندها آفاق و ديما غايكونو عندها آفاق للناس لي كاتقرا مزيان و كاتختار شعب تقنية و علمية، و من التسعينات لدابا و مع موجة البطالة لي كانشوفو وسط الشباب راه اليوم قادرين نشوفو و نعرفو الشعب لي عندها آفاق فسوق الشغل و تقدر تضمن عيش كريم للناس لي تابعينها ! اللغات، التقنيات، الشعب العلمية و الحرف من بين الادوات لي اليوم تقدر تلقا بيها خدمة ! اما اذا ختاريتي الجغرافيا و التاريخ و الدراسات الاسلامية راه من حقك ، و بغيتي تكمل و تاخد الدكتورا من حقك ، و لكن ماتجيش تبكي على الدولة من بعد باش تلقا ليك خدمة ! هادا هوا زهري و هادا ماحلبات البگرة !
بغيتي تعرف شنو المهن المطلوبة فسوق الشغل فالعالم كامل ماشي غير فالمغرب عطا الله ليزارتيكل فلانترنيت ، و من المعروف انه زمان الذكاء الاصطناعي هذا ، و زمن البيگ دايتا ، و الكودين ! فالدول المتطورة بداو كايدخلو هاد المفاهيم للدراري فالمدارس الابتدائية و حيت حنا بعاد بزاف على هاد الدول ماغاتلقاش هادشي فالمدارس و لكن غاتلقاه مشتت فالانترنيت!
اليوم اكثر من اي وقت مضى، التعليم متاح للجميع عبر الانترنيت !تقدر تتعلم حرفة ! خدمة تاكل منها طرف د الخبز و فابور و غي من دروس اليوتوب و المنصات المفتوحة و حتى من الجامعات الدولية الكبيرة و المعاهد المعروفة فحال الام آي تي فميريكان راهم حالين دروس مجانية لبزاف ديال الشعب فابور ! خاص غير الارادة تكون عند الواحد و لاعندك الارادة راه احتمال كبير انك توصل.
ولكن بالمقابل، باش هاد الشعب العلمية و التقنية و الحرف تتطور و تلقا سوق شغل ، راه مسؤولية الدولة انها تخلق مناخ للاستثمارات و تشجعو ، باش يجيو شركات عالمية يستثمرو هنا و يحلو لوزينات و المقرات ديالهم، المغرب عندو موقع استراتيجي فمنطقة ” مينا” و فالقارة كاملة، عندو استقرار ” نسبي” و مناخ اعمال عام على عام كايتحسن ! هادشي علاش الدولة خاصها تحاول ما امكن تجيب الاستثمارات و تخلق استثمارات و تحيد گاع ديك البيروقراطية و الرشوة و التخلويض و الاحتكار و تعزز استقلالية القضاء باش الناس ماتخافش تحط فلوسها عندنا.