بغض النظر على التصنيف ديال ايدريمز لي شوهنا فاش حط مطار كازا فزك الترتيب ! راه داك المطار ماكايمثلش المغرب احسن تمثيل! و خاصو الخدمة مازال باش يقدر يولي بوابة لاستقبال المسافرين و المستثمرين !

مؤخرا نتاشر واحد الصونداج دارو السيت ايدريمز المتخصص فالرحلات و لوطيلات و الطيارات ! هاد السيت دار آ سيادنا هاد الصونداج انطلاقا من 50.000 رأي ديال الناس لي عبرو على الرأي ديالهم فالمطارات عبر العالم ! و الاستنتاج لي خرجو بيه من هاد الدراسة هوا واحد الترتيب ديال المطارات من احسن مطارات فالعالم لأكفس مطارات ! و الطامة الكبرى هي يطلع مطار محمد الخامس فالبيضاء هوا اكفس مطار فالعالم ( الشيء لي رفضاتو لارام و لوحات انها تقدر تقاضي هاد السيت على نتائج هاد البحث)
نقدو نختالفو من ايدريمز فالطريقة باش دارو السونداج او فالتمثيلية ديال الناس لي جاوبو على الصونداج بالمقارنة مع الناس لي كايدوزو من مطار محمد الخامس ! و طبعا من حق الناس ديال لارام و لا المكتب الوطني للمطارات يسولو ايدريمز كيفاش دار هاد الصونداج و شنو هوما الوسائل لي عتامدهم باش يوفر واحد الشانتيو لي جاوب ! حيت هادشي ديال الصونداجات ماشي غير آجي و دخل بسباطك ! راه عندهم معايير علمية و احصائية خاصها تكون متوفرة باش النتائج تكون عندها مصداقية !
و لكن الطريقة باش رد المكتب الوطني للمطارات على هاد النتائج انا شخصيا كانشوفها طريقة غبية لجوج اسباب :
السبب الاول هوا مايمكنش تجي تقول لايدريمز نتوما كذابين و النتائج ديالكم مامنهاش و نتا ماعنكش دراية على الطريقة باش دار الصونداج و ماقادش تبين للناس مكامن الخلل فيه !
ثانيا ! باش تجي تكذب ايدريمز و تقوليها لا نتي كذابة ! علاش ؟ حيت حنا احسن مطار فافريقيا فهنا المشكلة ولات مشكلتين عاوتاني ! حيت اولا شكون قالها ليك ؟ و شنو الوسائل الاحصائية لي عتامد عليها ؟
ثانيا واحد هاد احسن مطار فافريقيا دخلتو فيها تا جنوب افريقيا؟ (نبغي نعرف هاد المعلومة حيت كاتبقا جنوب افريقيا هوب قاري متقدم فبزاف ديال المجالات)
ثالتا ! انا شخصيا كانقوليك واش ماحشمتوش ! واش هاداك وجهكم و لا قفاكم كاتقارنو راسكم بافريقيا ! القارة لي معظم الدول ديالها كاتقاتل غير باش توفر السلم و الخبز للمواطنين !!!؟ و كاتحلو فمكم ” آه حنا احسن مطار فافريقيا؟” واش كاتقارنو راسكم برواندا لي عاد خرجات من حرب اهلية ؟ و لا بالكوتيفوار لي تاهي عاد خرجات من حرب اهلية !؟ و لا بالكونغو الديموقراطية لي مسكينة مافيها من الديموقراطية غير السمية ؟ و لا بالسينيغال الدولة المهددة بالجوع ؟ و لا بموريتانيا لي مازال ماقدات توفر تا الما فالروبيني للمواطنين لي ساكنين فوسط العاصمة نواكشط ؟
ايوا شلا باش كاتقارنو !
المغرب خاصو يتقارن مع الدول المغاربية لي قريبة ليه من ناحية المعيشة ! و جنوب افريقيا !و كفى !
ثم انا شخصيا ! فاش كانشوف مطار محمد الخامس ! ماكانحسش بيه مطار كبير كايحفظ هيبة الدولة و كايعطي عليها صورة الدولة القوية لي باغا تلعب دور قاطرة التنمية فافريقيا ! كانشوف مطار متهالك ! لي السقف ديالو حتى لهادي سنة او سنتين مازال كايقطر فاش كاتصب الشتا و الصور راهم عندنا فواحد المقال فگوود ! و حتى من ناحية التنظيم و الجمالية و الاستقبال …ماكاتحسش بيه المطار الرئيسي فالمغرب ! بل كاينين مطارات صغار فحال ديال الرباط اكثر تنظيما و جماليا من مطار محمد الخامس !
و المشكلة انه كايستقبل اعداد هائلة من المسافرين حيت هوا محطة ايسكال للرحلات من و الى افريقيا ! يعني السينيغالي لي باغي يمشي لباريس كايدوز من كازا و المستثمر الفرنسي لي باغي يمشي للگابون كايدوز على كازا !
ايوا لا لقاو المطار مامنظمش ! مافيهش وسائل الراحة ! الكراسة عامرين ! ماكاينش بريزات كافيين باش تشارجي تيليفونك و بيسيك … ماكاينش ارشادات و زيد على هادشي الشفرة لي كاتوقع فالباليزات ديال المسافرين و لي هادي واحد السنة او سنتين كان ضحية ديالها شي وزير افريقي هوا و الوفد ديالو ! من الطبيعي الاجوبة ديال هاد الناس على الصونداج طلع المطار فزك الترتيب !
اليوم راه المطارات ولات كاتلعب على عنصر التجربة ! حيت المطار ماشي غير اجي و طلع فالطيارة ! راه كاتوصل ليه ثلاتة د السوايع قبل ماتقلع الطيارة و تما كاتبدا التجربة ديالك فيه و تقدر تجلس فيه ستة سبعة ديال السوايع لاعندك فيه شي ايسكال ! و تقدر تبات فيه گاع لا خاصك تساين شي طيارة معطلة و لا وصلتي معطل و ماعندكش كيف دير توصل للمدينة ! يعني خاص يكونو موفرين وسائل الراحة و التسلية لهاد المسافرين و خدمات مزيانة باش تردو التجربة ديال المرور عبر المطار تجربة مزيانة كايخرج منها المسافر فرحان و رااااضي !
راه السفر هادا ! و المسافر بار ديفو كايكون كاعي و عيان و مسخسخ و طالع ليه الدم ! لاجا عندك للمطار و لقا وسائل الراحة و حس براسو مرحب بيه و عندو قيمة راه غايبغي المطار ديالك و لاقلتي ليه ينوطيه غايعطيه نقطة جيدة ! زدتي تكرفصتي عليه ! و خنزرو فيه الناس لي خدامين عندك ! و لقا راسو ناعس فلارض حيت ماكاينش فين يرتاح ! و دخل للطواليط و لقاها خانزة و مافيهاش بابي جينيك ! و مشا يساين الباگاج و من بعد ماساين واحد ساعة لاروب لقا الباليزة طقبوها ليه ولاد علي و طرگو ليه الرويحات و الكادويات و الحويجات ! ماتسناش منو يعطيك نقطة مشرفة !
اليوم يمكن نتسائلو حول جودة و مصداقية النتائج ديال ايدريمز وي !
و لكن باش نتصنطحو و نقولو عندنا احسن ماااطااار ! اوهو !
ربطو السلوگية !