واش الجمهور ما بابقاش باغي يتفرج على الماتشات ديال المنتخب المغربي بعد نكسة الإقصاء من كأس إفريقيا في مصر. البيع قليل بزاف هاد الصباح والجمهور ما مصوقش للماتشات بثلاثة ديال المنتخب الوطني، سواء الاول أو المحلي أو الأولمبي. واخا الجامعة دارت ثمن رخيص باش تمكن الجمهور من الحضور بزاف (20 و50) درهم صافي، إلا أن الإقبال على “البيي” ضعيف بزاف. الأكيد أن الماتش ديال غدا، لي غادي يجمع المنتخب المحلي والنيجر ما غاديش يحضر فيه جمهور كبير، وحتى الماتش ديال المنتخب الأول مع بوركينافاسو واخا جا مدرب جديد، هو البوسني وحيد خاليلوزيتش. المنظمون غادي يستناو حتى الجمعة ويتعرفو واش غادي تنتعش عملية البيع. وربما سيضطرون إلى فتح ابواب الملعب فابور في الماتشات بثلاثة، خاصة مباراة المنتخب الأولمبي أمام مالي السبت المقبل، حيت الجامعة كتراهن على الجمهور باش اللاعبين يحققوا الفوز في هاد الماتش قبل يسافروا لمالي باش يلعبو الروتور. عملية البيع انطلقت من نهار الاثنين في مراكش والدار البيضاء وعبر الموقع الالكتروني للجامعة، ولكن البيع ما شي كثير. بزاف ديال الناس رجعو السبب إلى تواضع نتائج المنتخب في الكان بمصر، لحقاش الجمهور تصدم بعد الإقصاء غير المنتظر أمام بنين في الدور الثاني.
