قيادي من البي جي دي ل”كود”: هادي ثورة دارها رئيس الحكومة من 39 ل23 وخاصنا نعرفو باللي حكومة سياسية وفيها وجوه مزيانة بزاف وجديدة

دافع قيادي فحزب العدالة والتنمية على الحكومة الجديدة. القيادي اللي طلب ما دارش اسمو قال ل”كود” ان ما قام به العثماني ثورة حقيقية غادية تحسب ليه “كيفاش تنتاقدوه وهو رجع حكومة فيها 6 احزاب قبل ما يغادرها “التقدم والاشتراكية الى 23 وزير فقط. هاد الحكومة كان فيها 39 وزير.
المصدر اضاف ان هاد فحد ذاتو انجاز كبير كما دافع على الهيكلة الحكومية من خلال تجميع قطاعات تكون بيد وزير واحد ومن خلال حذف بعض الوزارات مثل الاتصال والحاق الوظيفة العمومية بالمالية….
المصدر شدد فتصريحو ل”كود” بخصوص الكفاءات على قضية ان هاد الحكومة راها سياسية وخاصها اغلبية تساندها فالبرلمان باش دوز قانون المالية والمشاريع الاخري اللي كتقدمها “واش كتسناو حكومة تقنوقراطية ولا كيفاش. راها حكومة سياسية فيها اجزاب قدمات وجوه جديدة. قدمات اللي عندها وكانت مشاورات وخرجات هاد الحكومة”.
مصدر “كود” قال ان هادا ماشي حكومة جديدة غير تعديل “كان ذكي” وشدد على الوجوه الجديدة اللي فهاد الحكومة واللي هي كفاءات كبيرة.