بداية مكتفرحش. هي الأسوأ لخاليلوزيتش.. اللعابة معصبين والجمهور مارضيش بيها

المنتخب المغربي خسر البارح الثلاثاء بملعبه وقدام جمهوره بملعب طنجة أمام الگابون بثلاثة لجوج في إطار استعدادات المنتخبين للإقصائيات الإفريقية المؤهلة إلى كأس إفريقيا بالكاميرون 2021.
هادي الهزيمة الأولى للمنتخب الوطني منين جا المدرب البوسني وحيد خاليلوزيتش ف 4 ديال الماتشات مقابل تعادلين وفوز صغير أمام منتخب متواضع، يعني البداية مكتفرحش على الإطلاق.
وأكثر من ذلك أن مستقبل الأسود ما واضحش ويثير المزيد من المخاوف بسبب التجريب المستمر وفشل الناخب الوطني في إيجاد التوليفة المناسبة للمنتخب المغربي حتا لدابا واخا دار 4 ديال الماتشات.
دابا حتا اللعابة خرجوا البارح من الماتش معصبين وماراضيينش بالمستوى، لي قدموا رغم الطابع الودي لمباراة الگابون.
علاش، لأن مستوى المنتخب كان ضعيف ف 4 ديال الماتشات وما بانتش شي حاجة مزيانة
حتا خاليلوزيتش ماراضيش بهاد النتيجة والحصيلة ديالو كاملة، هادكشي علاش كيگول أنه في مرحلة البناء والتأسيس.
الجمهور خرج البارح مقلق ومارضيش بالخسارة بالميدان كان عوال يربح المنتخب على الأقل باش يمحي الصورة السيئة، لي بأن عليها ف الماتشات السابقة، لكن أداء المنتخب ماكانش مزيان رغم وجود بعض الإشارات الإيجابية.
نفكروكم بللي المنتخب الوطني تعادل في المباراة الأولى أمام بوركينافاصو، وفاز في الثاني بهدف لصفر أمام النيجر، وتعادل في الثالث أمام المنتخب الليبي بواحد لواحد، وخسر ضد الگابون بثلاثة لجوج.