صحاب الامارات: السم فالعسل. كيفاش دولة كتحارب المغرب يسمح ليها تنقل الرجاء ضد الوداد وتاخد الارشيف وتربح مشاهدين ومالينها دگدگونا فملفات كثيرة وكيدخلو فشؤونا الداخلية

المشاهد المغربي غادي ينباهر باش يشوف كيفاش دارت قناة “ابو ظبي الرياضية” للدربي بين الوداد والرجاء فكأس محمد السادس اللي تلعاب السبت اللي فات وسالات ب1 ل1. اللي شاف الماتش غادي يكول: واو المغرب زوين وعندو ثقافة متنوعة وتقاليد ضاربة فالتاريخ.
المشكلة ان الامارات ما يمكنش تسنى منها شي حاجة فيها تمجيد. بلاد ختارت هادي سنوات قليلة تغير سياستها مع المغرب. من بلد صديق شقيق الى بلد كل مرة كتعطيه. الامارات ديال محمد بن زايد باغية تتحكم بفلوسها فمصير الدول العربية. باغية تقضي على كاع الاشكال الديموقراطية وتخلي غير الانظمة الاستبدادية.
علاش عنوان السم فالعسل٬ حقاش الهدف ديال الامارات ماشي الكورة ولكن تعطي صورة ايجابية علي صورتها لمقودة عند المغاربة والعرب عموما. القاتها فرصة باش تحسن صورتها هادي.
علاقة الرباط بابو ظبي خايبة بزاف. وصلات حتى استدعى المغرب سفيرو لفترة ماشي قصيرة. دولة دارت حروب صامتة على بلادنا. بغات تملك اعلامو. بغات تملك فقهاؤو بغات تملك مثقفيه. فشلات فهاد الشي.
هاد الهجوم بدا ف2017 وبانت المشاكل فملفات اليمن وليبيا وقطر. دخلات الامارات فموريتانيا الجار الجنوبي للمغرب. دخلات فاحتجاجات الجزائر الجار الشرقي للمملكة.
ما يمكنش تجي هاد الدولة بين ليلة وصباح وتكول اه المغرب مزيان. هي باغية تتحكم فالكورة. باغية تتحكم فرياضة كتسحر العقول. هاد التحكم خطير بزاف بزاف.
اش كتوجد هاد الدولة اللي تحولات من دولة محبوبة الى دولة مكروهة.
كيفاش مسؤولين باعو ريوسهم باش تاخد قناة رياضية فبلد متخلف ديموقراطيا ورياضيا ارشيفنا. باعو تاريخنا.