الاسلاميين ديما كانشوفهم مضامنين مع غزة والروهينگا والاويغور وشي طوائف مسلمة فأقاصي الارض و ماكاتشوفهمش مهتمين بالقضايا الوطنية لي كاتقيس خوهم المغربي الا اذا كانت فيها ريحة شي ايديولوجية عاطية ولا ريحة مرقة الانتخابات بالبطاطا!

الاسلاميين هاد الايام كايبارطاجيو اخبار شي طائفة سميتها الاويغور ! فاش قلبت عليها حيت ماكنتش عارفاها لقيتها من مسلمي الصين و لي من ديما كان عندهم مشكل مع الحكومة الصينية ! هوما كايقولو انها مكرفصة عليهم و كاتحرمهم منحريتهم الدينية و هي كاتقول بلي كاتحارب التطرف و الارهاب و مجموعة من الانفصاليين وكولا يلغي بلغاه!
المهم ! بعيدا عن مشكل الايويغور حيت الصراحة ماكانش عندي مايكفي من الوقت باش نطالع عليه ! المؤسف انه من ديما كانحس بانه الاسلاميين فالمغرب عندهم واحد الولاء كبير لشنو كايوقع برا المغرب ! غايغوتو على الايغور و يخرجو لنصرة غزة و يحطو تصاور اردوغان فالفوطو د بروفيل و يجيهم اكتئاب حاد على الروهينگا ! و يطالبو بالخروج للزنقة و يجمعو الفلوس و يطالبو بمقاطعة البضائع الصينية ( غير هادي نكتة بوحدها تقدر تضحك عليها تال غدا الصباح ) و قليل فين كانشوفو منهم هاد الاهتمام لقضايا وطنية (الا اذا كان عندها شي بعد ايديولوجي و لا بغاو يستاغلوها فالانتخابات فحال قضية المقاطعة) ! الاسلامي المغربي عندو ولاء و كايحس براسو قريب من شي اسلامي تركستاني ! باكيستاني ! من الروهينگا اكثر ماكايحس براسو مغربي عندو انتماء لهاد الارض و ناسها هادي حاجة معروفة ! كايهز الهم لخوتو فالجهة الاخرى من الكرة الارضية و المغاربة حداه فيهم بزاف فهاد الفترة كايموتو بالبرد !
طبعا التضامن ماعمرو كان مفروض ! و طبعا كل واحد حر يتضامن مع شكون مابغا ! و طبعا كانين الفرزيات فالتضامن ! و لكن التضامن ديال الاسلاميين كاتحس بيه ديما موجه لهيه ، ديما مضور الطبسيل جيهت شي شعب و لا شي طائفة غا حيت كايشتاركو معاها نفس الدين ! تضامن فيه ريحة “القبلية” و ريحة انصر اخاك ظالما او مظلوما ! فحالا هوما ضياف فهاد البلاد و ماكاتربطهم بيها حتى حاجة !
و الطامة الكبرى انهم كايعيبو على لحكومة الصينية داكشي لي كايديروه هوما براسهم ! الاقصاء و التهميش و السيطرة و التجسس هادشي كامل هوما ماكرهوش يطبقوه مع الاقليات لي كايعيشو معاهم و راهم كايطبقوه فاش كاتاح ليهم فرصة ! هوما براسهم كايغوتو باغين يطبقو حد الردة و باغين يسلخو مفطر رمضان و باغين يشدو المثليين فالحبس و باغين يدخلو لعباد الله فحياتهم الشخصية و علاقاتهم الجنسية و ضد اي محاولة للتفكير و الحرية و الغاء هاد النوع من الوصاية على عباد الله ! هوما يديرو الدعوة للدين الاسلامي و الناس مايديروش عندهم التنصير ! هوما يفرحو فاش شي نصراني يدخل للاسلام و يبداو يكتبو ديك ” و يستبدل قوما غيركم …” واخا يكون داك لي دخل للدين غا شي واحد باغي يتجوج شي مغربية و صافي فاطار القانون ! هوما كرجال يتجوجو بالديانات الاخرى و لكن عيالاتهم لا ! هوما يبنيو الجوامع فبرلين و باريس و لندن و نيويورك و لكن ياويلو شي واحد يبني شي معبد ديال بوذا فالرياض و لا شي كنيسة فالسودان و لا شي دير …خلاص ! هوما يمارسو الاقصاء و التطرف و التهميش و يفرضو قوانينهم على الاقليات و لكن يبداو يتباكاو فاش يتمارس عليهم نفس داكشي لي كايطالبو بيه !
و فاش كايوليو اقلية فشي بلاد و نفرضو انه تمارس عليهم نفس داكشي لي كايمارسو هوما على عباد الله كايبداو يغوتو و يشكيو ! واش ماشي قمة التناقض هادي ؟!
راه هادشي فات التناقض ! هادشي كايديرو شي حد لي كايشوف راسو احسن و اعلى مرتبة من الآخرين و منو حقو يخرا عليهم مهما كان ضعيف و جبان و مقودة عليه ! وهوما خاصهم يبقاو يراريو بيه و يعطيه الخاطر مهما تقواو و ولاو واعرين عليه ! الصيونص فيكسيو صافي !
تانعاود نوجع لقضية “مقاطعة البضائع الصينية ” وا هاهاهاها ! نكتة بوحدها هادي !