واش قضاءنا ما كيتعرضش لضغوط؟ كلشي كيشوف فمراكش واش قاضي التحقيق غادي يتابع دنيا باطما فحالة اعتقال؟ متابعتها فحالة سراح فالوقت اللي الصحافي عمر الراضي متابع فقضية ابسط فحالة اعتقال غادي يفضح كلشي

كاع اللي كيطالبو بمتابعة الصحافي عمر الراضي فحالة سراح وبقانون الصحافة ماشي بالقانون الجنائي ولا اللي كيطالبو بالغاء المتابعة كاع٬ عينهم على اش غادي يقرر قاضي التحقيق بمراكش اللي حالت عليه النيابة العامة هاد اليوم المغنية دنيا باطما وختها ابتسام فشبكة “حمزة مون بيبي”.
ايلى تمت متابعتها فحالة سراح غادية تنوض. غادية توقع مقارنات فهاد الفترة اللي ما محتاجيناهاش. كيفاش يتم اعتقال صحافي كتب هادي 9 اشهر تدوينة بعد الحكم استئنافيا على نشطاء الحراك واللي سحبها٬ ومتابعة هاد الصحافي اللي هو عمر الراضي فحالة اعتقال بالقانون الجنائي ويتابعو٬ ايلى قرر قاضي التحقيق٬ المغنية دنيا باطما فحالة سراح.
دنيا باطما تجبدات فقضية حمزة مون بيبي٬ استمعات ليها الفرقة الوطنية كيف كانت “كود” سباقة لنشر الخبر. هاد السيدة اللي خدات جوجت الاوسمة تستحق المتابعة. حقاش باش تاخد وسام خاصك تكون قدوة. تبعد على كل حاجة فيها شبهة. التحريات لحد الان كيتبين باللي ما دارت هاد الشي. كيهدرو المتابعات والمتابعين فهاد القضية عن دور دنيا باطما اللي خلات لغنا وقلباتها تلاجيت.
القضاء خاصو يكون فمستوى اللحظة. راه كلشي متبعو. متبع القرار اللي غادي ياخذو. القضية ما بقاتش غير شبكة حمزة مون بيبي واستغلالها وابتزازها لمواطنين لاجانب مقيمين بالمغرب٬ بل ولات واش القضاء يقدر يخدم بلا تدخلات. دنيا باطما فرحانة بشبكة علاقاتها.
طبعا كلنا عاقلين على حضورها لافتتاح مطعم للمدعو ابو زعيتر. كلنا عاقلين على معارفها مع بعض الشخصيات. واش غادي يطبق القانون ولا غادي اللا. نتسناو ونشوفو