بسباب “كورونا”.. الشينوا دارت قانون كيمنع الماكلة ديال الحيوانات البرية وكيجرم الاتجار فيها

من بعد انتشار فيروس “كورونا” القاتل فمختلف المقاطعات فالشينوا، صدرات الدورة 16 دالجنة الدائمة للمجلس الوطني 13 للنواب الشينويين قرار بمنع الماكلة ديال الحيوانات البرية ومنع التجارة غير القانونية فيها، على اعتبار أنها السبب رئيسي فهذ الفيروس، وكتشكل خطر على الصحة العامة للبشرية.
القرار، اللي اتخذو الحزب الشيوعي الشينوي، جا باش تتعزز المسؤولية القانونية للسيطرة على مصدر الخطورة، تجنبا لمخاطر ثانوية يمكن توقع فهذ الفترة اللي كتحارب فيه الشينوا “كورونا”، ووضع عقوبات لمن ينتهك القوانين المتعلقة بحماية الحيوانات البرية.
ووضع القرار أسس الاستهلاك الغذائي الحيواني فالشينوا، ودار ليست فيها الموارد الحيوانية اللي كتصلاح للاستهلاك الغذائي، فالماشية والطيور، واللي كتخضع لإشراف الإدارة البيطرية.
والقانون كذلك طلب من النشطاء على مواقع التواصل الاجتماعي باش يديرو مبادرة “كن إيجابيا” لمنع الماكلة ديال الحيوانات البرية، وهي المبادرة اللي لقات تفاعل كبير فصفوف الشينويين .
وكان الأمين العام للجنة المركزية للحزب الشيوعي الشينوي، شي جين بينكَ، قال، فاجتماع اللجنة الدائمة للمكتب السياسي للحزب بللي الماكلة ديال الحيوانات البرية خطيرة بزاف، ولكن صناعة الأغذية دهذ النوع من الحيوانات عندو حجم كبير وليه انتشار واسع فمختلف ربوع الشينوا، وخاص التصدي ليه.