علاش ما يديرهاش المغرب قبل يفوت الفوت. كورونا فيروس وقف لقراية فاسبانيا وضرب وزير الثقافة الفرنسي وقتل 97 ف24 ساعة بالطاليان وشعل لحباسات فايطاليا اللي ماتو فيها 6 غير فالمواجهات

قررت حكومة “كومونيداد مدريد” الجهوية قبل قليل عن توقيف الدراسة فكاع المدراس من ديال الاطفال حتى الجامعة ابتداء من الاربعا ولمدة 15 يوم كما تم الاعلان عن تعليق دخول الجماهير لكاع التظاهرات الرياضية فالبلاد. فمنطقة الباسك تقرر كذلك وقف لقراية فڤيكتوريا. هاد الشي جا بعد ما وصل عدد المصابين فهاد الفيروس فالصبليون 1221 وقتل 30 واحد.
دابا حنا فالمغرب مازال يالله لقينا جوج حالات وفق وزارة الصحة ديالنا ولكن عدد اللي من المحتمل يكون فيهم هاد الفيروس كل نهار كيطلع. علاش ما نديروش احتياطاتنا من اليوم وما نلعبوش. بدينا بتعليق حضور الجمهور فالتيرانات وخاص المدارس فالبلايص اللي فيها حالات اصابة بحال كازا دير برامج للوقاية.
هاد الفيروس ضرب مزيان اوربا. ففرانسا حتى هي داير حالة وقدر يصيب حتى وزير الثقافة فهاد لبلاد.
اما الطاليان فهاديك حريرتها حريرة مع هاد الفيروس. واخا دارو الحجر الصحي على اكثر من 16 مليون ايطالي فلامبارديا وغيرها من المناطق مازال هاد المرض كيقتل. فنهار واحد قتل 97 ايطالي. هاد لبلاد هي الثانية اللي قتل فيها “كورونا فيروس” ناس بزاف بعد الصين.
وحقاش لمصائب كتجي مجموعة فقد خلف قرار الحكومة الايطالية منع زيارة العائلات للمساجين فقد حدثت احتجاجات خطيرة فعدد من لحباسات. لحد الان هرب كثر من 30 حباس ومات 6 الحباسة.