قرار مسؤول.. كَاع حوانت “كَاراج علال” غيسدو اليوم بسباب “كورونا”

طالبات جمعية مسار المغربية لتجار ومهنيي كَراج علال، وجمعية السلام لتجار درب السلطان الفداء (كَراج علال)، من كَاع التجار والمهنيين مالين الحوانت الكبار والهريان فالمركب التجاري “كَراج علال” باش يسدو المحلات ديالهم انطلاقا من اليوم الثلاثاء 17 مارس 2020، وما يحلو حتى لإشعار آخر.
وجا هاذ القرار، فإطار الإجراءات الوقائية الاحترازية للحماية من فيروس “كورونا” المستجد والخطير، اللي كنتشر بسرعة، وتصابو بيه 37 مغربي لحد الساعة، وحدة فيهم ماتت.
أرباب المحلات ف”كَراج علال” أكدو، فبلاغ ليهم خصلات “كود” على نسخة منو، بللي هذ القرار تخاذ كذلك باش يحميو الزبناء و المستخدمين ديالهم، وضمان الامن الصحي ديال المواطنين.
وهذ الإجراء “ماكايشملش المركبات التجارية اللي كتبيع المنتجات الضرورية والمواد الأساسية ديال المعيشة والمواد الغذائية”، حسب البلاغ نفسو.
وكتشمل محلات كَاراج علال كل من قيسارية عزيزة والجميعة ومحلات درب السلطان، وعاد زيد الفراشة اللي كيحطو بزاف فهذ المنطقة.