ها بشحال حكمات المحكمة على عمر الراضي

حكمات المحكمة الابتدائية الجزرية ديال عين السبع فكازا على الصحافي عمر الراضي ب4 شهور ديال الحبس موقوفة التنفيذ، وغرامة مالية قدرها 500 درهم.
الجلسة ديال اليوم الثلاثاء 17 مارس كانت مخصصة للنطق بالحكم، اللي تداولات فيه هيئة المحكمة جوج سيمانات قبل ما يصدر.
وعلن دفاع الراضي على تشبتو بالحق فالاستئناف، وتاكدو من براءة الموكل ديالو.
وتدان الراضي ابتدائيا بتهمة “إهانة رجل القضاء”، بعدما نشر تغريدة على موقع التواصل الاجتماعي “تويتر”، كينتقد فيها الأحكام الصادرة فحق المعتقلين ديال الريف.
وكانت النيابة العامة أكدات بللي الراضي استعمل كلمة “الجلاد” فالتدوينة، وهي عبارة “مهينة للقضاء” حسبها.
وتشبث الراضي ببراءتو واعتبر راسو “غير مذنب”، كيف دافع، خلال كلمة ليه قدام هيئة الحكم، على حقو فالتعبير بكل حرية وإبداء وجهة نظرو فقضية الريف والأحكام الصادرة فيها.
من جهتو كان الدفاع ديال الراضي اعتبر بللي محاكمة ديالو بالقانون الجنائي ماشي معقولة، وبللي خاص النيابة العامة تتابعو بقانون الصحافة بحكم أنه صحافي.