عائلتو كذبات خبر الوفاة.. الفنان المغربي اليهودي بوطبول اللي تصاب بفيروس "كورونا" باقي حي

تبين بللي الفنان المغربي مارسيل بوطبول باقي حي، والصحة ديالو مزيانة، ومازال كيتابع العلاج ديالو فصبيطار فباريز، وهذشي اللي أكدوه الأقرباء ديالو فتصريحات صحفية.
ونشرات اليوم "كود"، نقلا عن موقع "إيلاف"، بللي الفنان المغربي اليهودي الديانة توفى من بعد ما تدهورات الحالة ديالو الصحية، قبل ما يردو أقرباء الفنان على هذ الخبر، ويأكدو بللي هذي مجرد إشاعات كيتك تداولها.
ونهار الاثنين دخل بوطبول الإنعاش بعدما تدهورات الحالة ديالو الصحية، وتم التأكد بللي كان مصاب بفيروس "كورونا" وماكانش عارف، قبل ما يوقع ليه اضطراب تنفسي حاد نقل بسبابو على وجه السرعة للصبيطار، ودخل قسم الإنعاش.
وكينتمي بوطبول، اللي عندو 75 عام، لعائلة فنية معروفة، حيت هو ابن الفنان جاكوب بوطبول وأخ الفنان حاييم بوطبول، وكان خاض تجربة سينمائية ففيلم "أوركسترا منتصف الليل" لجيروم أوليفر كوهين، واللي كيحكي القصة ديالو مع الغنا.