غايسجل 5 آلاف مكالمة فاليوم.. السونتر دابيل "ماجوريل" تكلف بمنصة "ألو يقظة" فابور

اعلن السونتر دابيل "ماجوريل" أنه غيتكلف بالرقم الأخضر "ألو يقظة" اللي دارتو وزارة الصحة للتعرف على الحالات المشكوك فإصابتها بفيروس "كورونا" المستجد، والإجابة عن أسئلتهم وإعطاء التوجيهات للحالات اللي ظهرات عليها أعراض الفيروس.
وقال مسؤول فريق فماجوريل فكازا، فتصريح صحفي، بللي غيجاوب السونتر على أسئلة المغاربة اللي كيتاصلو، ويسجل البيانات ديالو الشخصية، وتفاصيل الاعراض اللي كيحس بيها، باش يرسلها للوزارة منبعد، اللي هي غتكلف بيه.
وحسب بلاغ ليها، توصلات "كود" بنسخة منو، وضعات ماجوريل الخبرة ديالها فخدمة الدولة فابور، وعبئات كافة متعاونيها وبنياتها التحتية، فإطار مواجهة الوباء اللي دخل المغرب فحالة ديال الطوارئ الصحية، وتخفيف العبئ على وزارة الصحة.
وكشف البلاغ بللي هذشي غيدار من خلال معالجة مكالمات "ألو يقظة" بشكل فعّال وموثوق على الرقم 100 7474 080 ، وتخصيص منصة استماع تضم 100 مستشار، وتقديم خدمة متوفرة على مدار الساعة وطيلة الأسبوع بتغطية ل5 آلاف مكالمة يوميا.
في إطار هذ المساعدة، خصصات ماجوريل أربع مواقع لخدمة "ألو يقظة"، بحيت "تتم معالجة أكثر من 5 آلاف مكالمة يوميا منذ 24 مارس من طرف ما يقارب مائة من مستشاري ماجوريل المتطوعين. وتوفر الخلية خدمة واستماعاً متواصليْن وفق أفضل المعايير الدولية على مدار اليوم طيلة الأسبوع"، حسب نفس البلاغ ديما.
وللإشارة، ف"ماجوريل" كتقوم بتصميم وتقديم وإعادة صياغة تجربة الزبناء لفائدة أشهر العلامات التجارية العالمية، وكتوفر التواصل مع الزبناء ديالها بافضل المعايير، وكتقدم حلول رقمية من قبيل وسائل الإعلام على شبكات التواصل عبر الانترنت.