سكوب. 16 الف مغربي حاصل برا ومصدر من الخارجية ل"كود": تكفلنا بالسكنى وبالماكلة ل2218

قال مصدر ل"كود" من وزارة الشؤون الخارجية والتعاون الإفريقي والمغاربة المقيمين بالخارج، عن وضعية المغاربة العالقين في عدد من الدول الأجنبية.
وأفاد المصدر المسؤول ل"كود" أن المغاربة اللي حاصلين بعد ما تسدات الحدود واللي كانو فزيارة عائلية او للسياحة او لسباب الصحة او لاي سبب اخور واللي تواصلو مع سفارات وقنصلياتنا فكاع دول العالم راه لحد الان كثر من 16 ألف مغربي (وبالضبط 16818 مغربي إلى حدود ليلة أمس). فرانسا فالمرتبة اللولى للي حصلو فيها بزاف دياولنا"
وحسب هاد المصدر ل"كود" فإن المغاربة اللي تكلفات بيهم الخارجية لحد الان 2218 ، هادو كيستافدو من الماكلة من لوطيل او لقاو ليهم فين يسكنو. هاد الرقم كيقول مصدر "كود" كبزيد مع ارتفاع الشكايات والاتصالات بالسفارات والقنصليات.
مصدر "كود" گال لينا باللي اللي محتاج لشي حاجة لا دوا ولا طعام كنوجدوها ليه بلا ما نفكرو فالثمن. فهاد الوضعية تم التفكير فموارد مالية تخصصات لهاد الوضعية"
هاد المصدر قال ل"كود" باللي كاينين مشكلة "الفنادق اللي مسدودة فعدد من الدول الاجنبية. هاد الشي علاش كنكريو ليهم ديور ولا كنحولوهم لبلايص مازال فيها لوطيلات. مصدر "كود" وضح لينا كثر "فالصبليون مثلا. كاينين غير اوطيلات محدودة مفتوحة فشي مدن ولجأنا لخدماتها"