بعد إصابة زميلة ليهم بكورونا.. عاملات فشركة فعين السبع خرجو يحتجو وخافو يخدمو فظروف "مافيهاش شروط الوقاية الصحية" – فيديو

مجموعة ديال العاملات فشركة فالحي الصناعي عين السبع فكازا دارو احتجاج، اليوم الاثنين، قدام باب الشركة، بعدما رفض الباترون ديالها يكَلسو فديورهم ومايخدموش بعد اشتباه واحد السيدة معاه بإصابتها بكورونا.وفهذ الاحتجاج، العاملات استنكرو الوضعية اللي خدامين فيها، واللي كتنعدم فيها حسبهم أدنى شروط الوقاية الصحية، بحكم أنهم كياكلو مجموعين، وكيخدمو مجموعين، ومكايناش يناتهم مسافة ديال الأمان، ومن بعد ما دخلو الزميلة ديالهم للصبيطار واشتبه فإصابتها بكورونا زادو تخلعو كثر، وبغاو يتوقفو على الخدمة كيف ما دارو شركات ومصانع كثيرة فنفس المنطقة.
ياربي سلامة ????????الحي الصناعي بعين اللسيع لقاو بنت مصابة بكورونا في معمل للادوية
Publiée par المغاربه الاحرار في الغربه sur Lundi 13 avril 2020
وكيقولو المحتجات، اللي رفضو يخدمو اليوم، بللي الزميلة ديالهم تهزات هذي أكثر من 3 أيام، واليوم هزو سيدة خرى هي والبنت ديالها للإشتباه بإصابتهم حتى هوما.
وقالو بللي هوما خايفين يديو المرض لعائلاتهم، وخايفين على ريوسهم، وجاهم الوسواس ومرضو نفسيا، وباغاو يتوقفو على الخدمة مؤقتا على ما تدوز هذ الجايحة.
من جهتهم، حاول القايد وبعض المقدمين فالمنطقة بالإضافة لمجموعة من عناصر الأمن والعسكر يمنعو العاملات من الاحتجاج، ولو بطريقة اللي تقدر تعرض حياتهم للخطر، ونصحوهم مايغوتوش، ومايقربوش لبعضهم ويبقاو محترمين مسافة الأمان، باش ماتنتقل شعدوى الفيروس بيناتهم.
أعوان السلطة بقاو فبلايصهم حاضيين البنات آش كايديرو، باش يمنعوهم يرتكبو شي فضيحة يقدرو يندمو عليها من بعد.