الخارجية الهولندية كتنصح مواطنيها اللي مسافرين للمغرب: ردو بالكم من الكسايد كثر من “كورونا”

وضعات وزارة الخارجية الهولندية رهن إشارة الهولنديين وحتى المهاجرين اللي كيقررو يسافرو لبلدان أخرى فهذ الفترة اللي انتشر فيها فيروس “كورونا” المستجد، ومن ضمنهم المغرب، مجموعة من النصائح والإرشادات الصحية اللي خصهم يتبعوها.
بالنسبة للمغرب، الخارجية الهولندية دقات ناقوص الخطر للمغاربة/ الهولنديين أو الهولنديين اللي بغاو يسافرو ليه، ونصحاتهم باش يردو البال من حوادث السير اللي كتوقع أكثر ما يردو البال ل”كورونا”، على اعتبار ان آخر الأرقام الرسمية كتقول بللي المغرب 21 شخص مات بسباب الحوادث فالمدن، وألفين و211 تصابو بجروح غير فالسيمانة اللي فاتت.
وزارة الخارجية الهولندية، فالموقع ديالها الرسمي، استنتجات بللي أغلب حوادث السير اللي كتوقع كتكون فالعطل وليجور فيريي، وفهذ الفترات بالضبط خاص المسافرين يتوكَضو شوية، وإلى وقعلهم اي مشكل يتصلو ب”الأمن الطرقي” و”المصلحة الصحية”.
بالنسبة لفيروس “كورونا”، قالت الخارجية الهولندية بللي هولندا ماباغاش بأي وجه كان تكون سبب فتفشي الفيروس فمختلف أنحاء العالم، ونصحات المسافرين ديالها باش يراقبو الصحة ديالهم قبل مايسافرو للمغرب وبعد ما يسافرو، وينفذوا تعليمات الوقاية اللي دايراها وزارة الصحة المغربية.
من جهة أخرى كتقول وزارة الخارجية بللي المغرب داير جميع الاحتياطات باش يتصدى للتهديدات الإرهابية، لكن واخا هكذاك، المواطنين الهولنديين خاصهوم يحضيو راسهم.
ووضعات وزارة الخارجية الهولندية درجة الخطورة اللي ممكن تعترض السلامة الصحية والأمنية ديال المسافرين على حساب كل بلاصة فالخريطة المغربية، اعتبرات بللي فالحدود الشرقية الجنوبية مع موريتانيا كاين ريسك بزاف وممنوع السفر، فالصحراء المغربية والحدود الشرقية مع الجزائر كاين ريسك متوسط، وفالشمال دالمغرب (من طانطان لفوق) يمكن للإنسان يسافر بلا مايخاف.