آيت الطالب: غادي نكترو من تحاليل كورونا.. وهذشي مادرناهش من الديبار باش مانستنفذوش الآليات ونكَلسو أونبان

كشف وزير الصحة، خالد آيت الطالب، بللي غادي يتم توسيع دائرة التحاليل المخبرية للكشف على فيروس كورونة المستجدد، وهذشي استعدادا للخروج من العظلة الصحية اللي كاينة، وباش يتم تقليص مدة ظهور النتائج.
وزاد الوزير كيقول، فجواب ليه على سؤال حول "الإجراءات والتدابير المتخذة لمحاصرة انتشار فيروس كورونا المستجد بالمغرب" فمجلس المستشارين، اليوم الثلاثاء، بللي هكذا غايسهال الكشف على الناس اللي تقوات المناعة ديالهم بعد الشفاء من "كوفيد 19′′، وتشخيص رقعة المواطنين المصابين، وتوفير الدواء والعزلة الصحية.
وهذشي مادارش من البدية كيقول آيت الطالب حيت المغرب غادي بالتدريج، وأكد فنفس الوقت بللي كون مشاو وسعو التحاليل من الديبار كانو غادي يستنفذو أدوات التحليل ويبقاو أونبان.
وأكد الوزير بللي العزلة الصحية غادي تستمر حسب التطور الوبائي فالمغرب، حيت "الوباء يقدر يتضاعف، وخاص حالة الطوارئ تستمر حتى يتم الاطمئنان على وضعية الحالة الوبائية"، على حساب هضرتو.
وواخا هكذاك، قال آيت الطالب بللي مؤشر سرعة انتشار الوباء وإمكانية انتشار العدوى بدات كتتقلص، وهذشي كيدل بللي كاين تحكم فالوباء، ولكن هذشي مكايعنيش أننا خصنا نتفاءلو ونقولو نجحنا وانتصرنا فالمعركة، كيت إلى تراخينا يقدر يعاود الفيروس ينتشر بسرعة كبيرة.
وقال بللي الجايحة كتعرف تطور من منطقة لأخرى، وعلى حساب مرحلة انتشار الوباء، "وحنا فالمغرب فالمرحلة الثانية، وكنعتمدو على الملاءمة وفق الإمكانيات المتوفرة محليا"، كيف قال.