الصين باش قدرات تسيطر على الفيروس سدات الأحياء والماكلة تجيك حتى لعندك، حنا منقدروش نديرو هادشي ولكن على الأقل يمكن أن كل حومة يكونوا فيها الخضارة ديالها والكمامات موجودين فيها باش تنقص الخيطي زيطي

قبل ماتسجل حتى حالة ديال كورونا في المغرب مشيت لصيدلية وخديت ربعة ديال الكمامات جراحيين بخمسة دراهم للوحدة، مولات الصيدلية سولاتني واش دخل كورونا للمغرب قتليها باقي ولكن غادي يدخل إن شاء الله وذلك ماكان من بعد بشي يوماين الكمامات تفقدو من السوق، ستعملت لحد الآن تلاتة من دوك الكمامات، اللولة كنت باقي عندي أمل ستعملتها مرة وحدة خرجت تسخرت بيها ولحتها، من بعد تفكرت حكمة الواليد ماتكب ما حتى تسقي لاخر، مشيت درت فالصيدليات لي حدا الدار على الكمامات والكحول الطبي مالقيتش، داك الساعة جمعت راسي مع الكمامة وليت نخرج بيها نرجع للدار نعلقها ونرش عليها الكحول الطبي ونخليها حتى تموت كورونا بالوحدة، مادام أنني الى طبقت التوصيات الصحية راه خاص نلوحها ولحد الآن مكايناش كدور فالحي فين ساكن، لدرجة كاين صيدلية علقات ورقة مكتوب فيها معندناش الكمامات.
نهار السبت دزت للصيدلية لي حدا الدار سولتها على الكمامات قاتلي التنين ولا التلات يكونوا موجودين، دزت التلات قاتلي باقي ماجابوهم ليهم دزت عند جوج صيدليات خرين حتى هوما معندهمش، حقا راه الى درت كثر وقلبت غادي نلقاهم، ولكن راه الهدف من الحجر الصحي هو بنادم ينقص الدوران والطوطيح، ويخرج يلقى لحاجة فحومتو ياخدها ويرجع لدارو، كذلك الأمر مع الخضرة والديسير، كانو واحد موالين الكرارس كيوقفو حدا الجامع كثار والخير موجود ومكاين لا زحام لا والو، وحتى الى لقيتي واحد واقف عندو كليان كتمشي عند لاخر حداه، ناضو جراو عليهم وفتحو سوق نمودجي كان باقي معطل ولكن زربو عليه بسباب هاد الجايحة وهو الوحيد وسط جوج احياء كبار، لذا عوض نتقدى من حومتي بلا زحام ونرجع لداري وليت كنمشي لسوق عامر بالباشار لي فالغالب لابس كمامات مصبنين ومعاودين.
الصين باش قدرات تسيطر على الفيروس سدات الأحياء والماكلة تجيك حتى لعندك، حنا منقدروش نديرو هادشي ولكن على الأقل يمكن أن كل حومة يكونوا فيها الخضارة ديالها موالين الكرارس موجودين خاص غير يخليهم المخزن، راه يخرج الواحد ويتقدى من حدا دارو ويرجع حسن مايتجوق فالسويقات راه هاداك هو الخطر الحقيقي، بالإظافة الى الإحساس بالغبن لي عند موالين الكرارس لي مكيخليهمش المخزن يترزقو الله ملي كيشوفو وحدين خرين فالسويقات خدامين على راسهم وعليهم الزحام مكيحكوش راسهم، وهوما شاريين السلعة وكالسين يدورو بيها من قنت لقنت وفين موقف يقلقى المقدم واقف ليه عند راسو تحرك من هنا، انا مثلا ساكن قالقرويين كنت كنخرج نتقدى من حدا الجامع خضرة وديسير وأي حاجة بغيت من حدا جامع القرويين الدراري مستفين والخير موجود والدنيا خاوية وأغلب الكليان بطوموبيلاتهم كيوقفو يتقداو ويزيدو وكاين لي كاع مكينزل من طوموبيلتو، دابا وليت خاص نمشي نتزاحم فالسويقة ديال حي أنس لي جامعة جوج أحياء كبار، أنا شخصيا كيبان ليا أن خاص المواطن مايخرج نهائيا من الحي السكني ديالو إلا للطوارئ ويكون تشدد كثر فالحجر الصحي كثر من هاكة، أو غادي يضربو الناس كاع مجهودات الدولة وتضرر لإقتصاد فالزيرو.