كورونا ماشي لعنة من عند الله مسيفطها غير للمدن ديال مساخيط الواليدين والمدن لي باقا ماوصلات ليهم راه هوما لي غادي يركبو مع نوح فالسفينة، كورونا راه فيروس مكيفرقش بين الناس أيا كان إعتقادهم ولا طبقتهم الإجتماعية ولا منصبهم

كاين شي وحدين ملي كيفيقو وهوما كيدعيو مع المدن أو الدواو فين ساكنين في حالة مكانتش فيهم كورونا، وكتلقاه كيهدر بنوع من الفخر أن كورونا ماقدراتش توصل عندهم، ونوعا ما هذا دليل على أن الله إسطفاهم دون غيرهم من المساخيط في المدن والقرى الأخرى، وملي كتسجل أول حالة عندهم كيبداو يدعيو فهاداك لي جاب ليهم المرض، وكاين لي كيطالب بأنه يتشد ويتعاقب، حقا في بعض الحالات كاين ناس لي نشرو العدوى بسبب الجهل والتعنت ديالهم والإستخفاف بالفيروس، ولكن عموما هذا فيروس طولانطي يقدر يشد فالواحد وبلا ماتبان عليه الأعراض يكون كينشر الفيروس على خاطرو، والأمر في العديد من الاحيان معندو علاقة حتى بالتهور ديال الفرد أو عدم إلتزامه بالوقاية المطلوبة، ولكن مع ذلك كيبقاو يشوفو فيه الناس بحال إلى هو أو هي الطاعون شخصيا غادي على رجليه.
كورونا ماشي لعنة من عند الله مسيفطها غير للمدن ديال مساخيط الواليدين والمدن لي باقا ماوصلات ليهم راه هوما لي غادي يركبو مع نوح فالسفينة، كورونا راه فيروس مكيفرقش بين الناس أيا كان إعتقادهم ولا طبقتهم الإجتماعية ولا منصبهم، فيروس طلى كاع العالم ووصل لجزر نائية، مابقا غير فيلاج في المغرب، والناس لي ظهرات فيهم وكيكونوا غادين للسبيطار كتلقى جيرانهم كيصورو وشي تعليقات كتجيب الغمة بحال الى غادين لأفران الغاز ماشي للسبيطار، ونهائيا واش تسمع شي تعليق مشجع كيهز المورال مكاين غير البكى والتغرنيك، والشفقة المفرطة، حتى داك الدعاء لي كيدعيو بيه مع الواحد، كتحس بيه بحال الى كيبغيو يقولوا غير صبر هذا عار غادي يبقى لاصق فيك حياتك كاملة، فلان لي جاتو كورونا، دار فلان لي ماتت مهم بكورونا، خالة فلانة لي دخلات المرض للحومة وهي لي عادات فلانة وفلانة.
كاين الناس الخدامي ديالهم كتخليهم مباشرة فالصفوف الأولى، رجال الأمن موالين الحوانات الموظفين ديال الإدارات لي باقين حالين، المستخدمين ديال الأسواق الكبرى، الخضارة وغيره من المهن المهمة والضرورية ولي مستحيل توقف، هادو راه كيغامرو بحياتهم يوميا الى تقاس فيهم شي حد بكورونا وعادى الأسرة ديالو وكان سبب في إنتشارها أو خلق بؤرة، فهذا مكيعنيش أن هاد الشخص مجرم خاصو يتعاقب، راه الناس مكتنشرش فيروس عن وعي ومكاينش شي حد غادي يمشي يعادي اسرتو أو واليديه بلعاني، وللأسف منشورت كثيرة فالفايسبوك دال مغاربة مفتاخرين بعدم وصول كورونا للمناطق ديالهم، شوية غير كتسجل حالة أو جوج عندهم كيبداو يطالبو بمحاسبة المسؤولين عليها، والله يهديكم راه فيروس هذا.