"حميد" الغماري ديال "دوزيم" بدع طريقة غبية فالحوار الصحافي. جاب وزير الصحة وبدا عليه "سيدي" كنشكروكم راكم انتوما خدامين وخصصتو لينا واحد لوقيتة. لا فضيحة التحاليل الخاسرة لا عودة لمغاربة تجبدات =فيديو =

البارح فبرنامج صلاح الدين الغماري علي دوزيم اللي كيخصصو ل"كورونا فيروس" استضاف وزير الصحة خالد ايت الطالب. وزير ضعيف فتواصلو. خربقها فامور كثيرة فالتعاطي مع هاد الحايجة. ما علينا ما كيهمش.
المهم طريقة هاد الصحافي. بان كيخربق. شوفو غير الدخلة كي مقودة "عواشركم مباركة مسعودة وكنشكروك راكم انتوما خدامين بالليل وبالنهار واخا هاكاك خصصتو لينا واحد لوقيت باش تجاوبو المواطنين على الاسئلة ديالهم الله يجازيكم بيخير". كيفاش واخا هاكاك. واش هادا عايش فشي كوكب. وزراء الصحة فالعالم المتقدم والمتخلف كيضاربو باش يدوزو فالاعلام العمومي او الخاص. باش يشرحو.
يتواصلو مع المواطنين يجاوبو على اسئلة الصحافيين مهمة بزاف بزاف. مهمة اكثر مما يتصور هاد الصحافي اللي كيطيح من قيمة خدمتو.
نقطة اخرى مستفزة بانت فهاد الحوار هي هاداك الاسلوب المصري او المشرقي فتقديس الناس بالتكبير بيهم. ما مولفينهاش فالمغرب. منين جابها. هو وزير وانت صحافي علاش هاد العبارة "سيدي خالد" و"سيدي محمد اليوبي". واش الدارجة كتفرض عليه هاد الاسلوب ديال التلحميس.
نرجعو للحوار اللي ما كانش حوار صحافي واخا جاب معطيات بقدر ما كان تواصل من الوزير. قال ما بغى ما حبسو ما عقب عليه ما حرجو وكاين اسئلة كثيرة انية. غاديين تقول لي اللا دوزيم ماشي طريقتها هادي. خطأ. كان عليه يسولو على مواضيع انية على الاقل جوج فاخر الحلقة ماشي يخليه غير كيهدر. زميلو فالحكومة وزير الخارجية والتعاون قال باللي عودة لمغاربة اللي حصلو برا بيد وزارة الصحة. هادا سؤال عادي.
ثم ما كشفته "الصباح" عن خطآ فالتحاليل اللي دارو فميريزكو فكازا. طلعات ايجابية وبعد ما تعاودو فبلاصة اخرى طلعو سلبية. هادي فصميم عمل وزير الصحة علاش الغماري ما سولوش. فين خدمة الصحافي.
داها فالتلحميس وسيدي ومولاي ونسى الاهم. هاد التلميح خلى وزير الصحة ينسى اسمو ويقول ليه "السي حميد". اعتاقد بللي اللي معاه هو حميد ساعدني ماشي الغماري. عاودها ليه جوج المرات. فالثانية غاد صححها الصحافي.
باش كتبعد على الصحافة كتولي غير كتخربق.
دوزيم دايرة مجهود كبير فظروف صعيبة ماديا. خدامة فوق طاقتها. خدامة بمجهود استثنائي ولكن باش تحافظ على قوتها خاص هاد الغماري يتقاد ولا يعطي المهمة لصحافي يدير الصحافة وكاينين فالقناة.