فايك نيوز. لائحة متداولة بشكل كبير على مواعيد التسجيل فالمدارس العليا ماشي صحيحة.. ومصدر إداري من مدرسة ل"كود": هذشي مامنوش

تداولو نشطاء على شبكات التواصل الاجتماعي، بناء على معلومات حطوها مواقع التوجيه المدرسي الخاصة بالإعلان على مباريات ولوج المدارس العليا العمومية، ليست ماصحيحاش ديال مواعيد وضع دوسيات تسجيل فالكونكورات عبر الانترنت فالسنة الأولى فمجموعة من المدارس.
هذ لاليست كتبرز مواعيد التسجيل القبلي فكل من المدرسة الوطنية للتجارة والتسيير، المعهد العالي لمهن التمريض وتقنيات الصحة، المعهد العالي للتجارة وإدارة المقاولات، المدرسة الوطنية العليا للفنون والمهن، والمعهد العالي للدراسات البحرية، لكن المعلومات اللي وردات فيها مادقيقاش، وبعيدة كل البعد على الصحة.
وفغياب أي معطى فالمواقع الخاصة بهذ المدارس على التسجيل، باستثناء المعهد العالي للتجارة وإدارة المقاولات، اتصالات "كود" بمسؤولين إداريين فيها للتأكد من صحة هذ المعطيات، منهم جاوب مصدر من إدارة المدرسة الوطنية العليا للفنون والمهن كيقول بللي مازال لحد الساعة ماكاين والو من هذشي اللي كيروج.
وأكد المصدر نفسو بللي المدرسة كتسنى توضيحات كثر من وزارة التربية الوطنية، قطاع التعليم العالي، بخصوص تطبيق "توجيه" اللي غيتم من خلالو انتقاء الناس اللي غيتسجو فالسنة الأولى العام جاي فأربع مدارس عليا، ومن ضمنها المدرسة الوطنية العليا للفنون والمهن، والمدرسة ماغادي تدير قبل من هذشي حتى شي إجراء آخر من هذ القبيل.
وكانت الوزارة علنات، فبلاغ ليها، على تسهيل التسجيل فأربع مدارس عليا، اعتمادا على الانتقاء بتطبيق "توجيه"، وكيتعلق الأمر بالمدرسة الوطنية للتجارة والتسيير، والمدرسة الوطنية للعلوم التطبيقية، والمدرسة الوطنية للمهن، والمدرسة الوطنية العليا للفن والتصميم.
أما بخصوص المدارس غير المعنية بقرار الوزارة، ومنها المعهد العالي للتجارة وإدارة المقاولات، فهو المعهد الوحيد فهذ لاليست اللي كان لونصا التسجيل عبر الأنترنت ما بين 2 حتى ل24 أبريل، ودابا فتح الباب لوضع الدوسيات عبر الانترنت حتى ل21 من هذ الشهر، وهذ المعطيات ماشي هي نفسها اللي تم تداولها، بحيث مواقع التوجيه مازال كيسوقو لكون أن المعهد فاتح التسجيل من 29 أبريل حتى ل17 ماي، وهذشي ماشي صحيح.
وكاينين معاهد أخرى حتى هي لونصات التسجيل عبر الأنترنت، وكيتعلق الأمر بالمدرسة العليا للفنون الجميلة، والمدرسة العليا لصناعة النسيج والألبسة، وأكاديمية الفنون التقليدية.