محتاجين دابا لما هو ايجابي. علاش كتخرجو لينا لفتيت اللي كيعطي ميساجات سلبية وتبعدو بنشعبون والعلمي اللي كيبيعو للمغاربة الامل

عبد الوافي لفتيت ما كيتصرفش كوزير للداخلية. كتحس بيه كيف بان البارح فمجلس المستشارين٬ كبر من رئيس حكومة. لا كيفاش كيهدر لا علاش كيجاوب. اييه ديك اللقاء بين رئيس الحكومة الصوري وبين زعماء الاحزاب كان مكتوب عليه هو مول العرس. اي لادمين. عندو السوارت ديال كلشي. هادي هي الصورة اللي كيدوزها.
لفتيت فاول خرجة ليه فالبرلمان كان متأثر وصلات رسالتو للمغاربة. حنا فباطو واحد. غير نغرقو كلنا ولا ننجاو كلنا. هادي كانت مزيانة. من بعد رجع لخطابو كيف كان فالسابق. خطاب سلطوي. لبس الكاسكيطة ديال وزير الداخلية.
واش المغرب محتاج لخطاب فيه ات "الإعلان عن بعض القرارات ، مؤخرا ، لا يعني بأي حال من الأحوال رفع حالة الطوارئ أو الخروج من حالة العزلة الصحية" كيف قال فمجلس المستشارين البارح وباللي "يجب الالتزام التام بالتدابير الوقائية المتخذة على اعتبار أن خطر انتشار الفيروس مازال مستمرا". وباللي "حالة الطوارئ الصحية لا تزال سارية المفعول إلى غاية 10 يونيو الجاري، طبقا للقانون، ولا ينبغي فهم مزاولة بعض القطاعات الاقتصادية لأعمالها على أنه رفع لحالة الطوارئ"
وباللي على المواطنين والمواطنات "مواصلة الالتزام التام بالتدابير الوقائية المتخذة وبقواعد العزلة الصحية المعمول بها حاليا، إلى حين اتخاذ السلطات المختصة للقرار المناسب بخصوصها، حيث سيتم قبل ذلك إجراء تقييم ميداني دقيق للوضعية الوبائية بالمملكة، وفق المؤشرات العلمية المعتمدة من طرف السلطات الصحية.
كنظن هاد الوزير عارف اش واقع فالعالم. عارف كيفاش الوضعية. واخا الحكومة. المغرب ما يقدرش يصبر. خاص رويضة الاقتصاد تتحرك. راه ما بقاش الصبر. غدا يقدر يولي هاد الحجر مع قلة الموارد اخطر من امكانية الاصابة بكورونا فيروس. غاديين يخرجو الناس اللي تفقرو. اللي جاعو. اللي عاناو. ديك الساعة لا الامن الا حتى الجيش يقدر يحبسهم.
المغرب اليوم محتاج لخطاب بنشعبون وزير الاقتصاد والمالية. محتاج لخطاب وزير الصناعة والتجارة مولاي حفيظ العلمي. هاد الخطاب فيه الامل. فيه خاص الامور تطلق. فيه ما هو ايجابي. ما فيهش التهديد او الوعيد.
محتاجين للامل. شي وحدين انتاقدو هاد الامل اللي زايد. ماشي مشكل. فبعض لحظات تاريخ الشعوب محتاجين لهاد النوع من الامل. لهاد النوع من الخطاب. مزيان للحمة الوطنية. مزيان باش نفتاخرو ببلادنا.
اليوم ما خاصش واحد بحال لفتيت وطبعا بنعرفة بما ما نهدرو عليه٬ يبقى يخرج. خاص وزيرا المالية والاقتصاد والتجارة والصناعة يخرجو. راه يالله غاديين ندخلو لمرحلة الازمة. هاد الشي اللي عايشينو غير قليل من اللي كيتسنانا. شوفو الدول المجاورة. شي كيتوقع 3 سنين باش يرجع كيف كان فمارس اللي فات.
باش تعرفو الازمة فين واصلة شوفو اش واقع لشركة بحال الخطوط الملكية المغربية. ملايين كتخسر فالنهار وعندها سنوات باش ترجع شوية العافية ديالها.
خاص لمغاربة يخرجو. الطريقة اللي معمولة اليوم غبية. ما كاين حتى شي افاق. حتى واحد ما عندو معطيات وقتاش يفتحو الحدود وتونس قررات تفتحهم فاخر الشهر واسبانيا فيوليوز وايطاليا فتحاتهم. هادو دول دكدكهم كورونا فيروس ولكن ما يقدروش يصبرو اكثر.
المغرب ما ضرباتوش كورونا فيروس مزيان ولكن راه بزاف هاد الصرامة اللي مازال. خاص الناس يتنقلو. خاص الناس تروج الحركة. راه اقتصادنا معول بزاف على الاقتصاد غير المهيكل. هادو ماشي فقرا ولكن ولاو مع كورونا فقرا.
باراكا من لفتيت. خليو بنشعبون والعلمي يبانو