حصيلة كورونا فهاد 24 ساعة: 81 تصابو و2 ماتو و329 تشافاو .. الطوطال : 8003 حالة ولكن غير 600 اللي مازال كيتعالجو

اليوم الخميس 4 يونيو، سجل المغرب ارتفاع ملحوظ فعدد الإصابة بالفيروس بالمقارنة مع الأيام اللي فاتت، بحيت 81 تصابو فهذ 24 ساعة، وهكذا وصل الطوطال ل8003، ومعدل الإصابة تحدد ف 22 لكل 100 ألف نسمة.
وكشف معاذ المرابط، مسؤول قسم الطوارئ الصحية فوزارة الصحة، أن 78 من هذ الإصابات الجديدة تم اكتشافها فإطار منظومة تتبع المخالطين، اللي شملات فالمجموع 47 ألف و607، ولحد الساعة مازال 7472 مخالط تحت المراقبة الصحية.
وبالنسبة للتوزيع الجغرافي للإصابات، قال المرابط، فالندوة اليومية الخاصة بالترصد الوبائي للفيروس، ان جهة مراكش آسفي سجلات 31 حالة فبؤرة عائلية، و22 حالة تسجلات فطنجة تطوان، و14 ففاس مكناس، و12 فكازا سطات، ثم 2 فالرباط سلا، وباقي الجهات ما سجلات حتى إصابة.
واليوم، تسجلات 2 وفيات جديدة، وحدة فجهة كَلميم وادنون ولخرى فجهة الرباط، وهكذا بلغ عدد المتوفين 208 فالمجموع، لكن فالمقابل بقات نسبة الوفيات مستقرة ف2,6 فالمية، وهي أقل بكثير من المعدل العالمي اللي هو 5,8 فالمية.
وتشافاو فهذ 24 ساعة الأخيرة 329 حالة، ووصل عدد المتعافين فالمجموع ل 7195 حالة، واللي كيشكل 90 فالمية من عدد الإصابات الإجمالي.
وبقات غير 600 حالة نشيطة كتلقى العلاج فالمستشفيات، منهم 15 فحالة حرجة وكيتوزعو هكذا: 10 فجهة كازا، و3 فمراكش، وحالة واحدة فطنجة، وحالة أخرى ففاس.
وتم استبعاد 13 ألف و105 حالة إصابة بكورونا خرجات تحاليلها سلبية، ووصل عدد الحالات المستبعدة فالمجموع ل253007.
وهذا توزيع الاصابات حسب الجهات: