المغاربة الحاصلين برا: بزاف كيحتجو حيت مارجعوش من مليليا والجزائر.. وحدين خرين كعاو على قرار بوريطة اللي نساهم.. واحتجاجات كبيرة غتنطلق غدا الخميس فأوروبا – تصاور وفيديوهات

المغاربة اللي برا باقيين كيحتجو، وخصوصا منهم اللي واحلين فالجزائر وسبتة ومليلية، وما ستفدوش من قرار الترحيل بحالهم بحال خوتهم اللي كانو حاصلين معاهم فنفس هذ المناطق.
مجموعة منهم طلقات، عبر مواقع التواصل الاجتماعي "فيسبوك" نداءات على شكل فيديوهات، باش يأكدو أنهم مارجعوش مع الأفواج اللي جات للمغرب، ويصرحو بللي مازال معاهم مغاربة خرين. مغربي حاصل فالجزائر صور راسو من حي ديال البرارك، كيقول بللي جا فاللول ديال مارس على قبل خدمة ديال 20 يوم، وبقى حاصل من بعد للآن، بنت أخرى صورات راسها من احتجاجات مغاربة فسفارة مليلية، كتقول بللي كاينين مازال العشرات حاصلين تماك، ومابقى عندهم امل من غير الاحتجاج.
الاحتجاجات مستمرة فمناطق أخرى أيضا، اليوم العشرات ديال المغاربة احتجو قدام السفارة المغربية فتونس، كيحتجو على عدم اهتمام الحكومة المغربية بيهم، وعدم إدراجهم فالقرارات اللي اتخذات مؤخرا ديال ترحيل المغاربة.
وغدا غادي تكون احتجاجات أكبر قدام السفارات فمجموعة من الدول الأوروبية، خصوصا ففرنسا اللي عوالين الحاصلين المغاربة فيها يخوضو اعتصام مع إضراب على الطعام لمدة 24 ساعة.